Month: अप्रैल 2008

Shri Lanka mein chal rahi utha patak

Shri Lanka hamara padosi mulka hai. Hindu dharma granthon mein Lanka matalab Raj Rawan ka samrajya samajah jata hai. Bhartiya sanskriti mein Lanka ek jana pahachana naam hai.

 

Kisi samay yah desh Bharat desh se juda hua tha. Jisa ki paramparayen aur dharmik granth batate hain. Is desh mein pichchale kuchch varshon se Tamil samasya ka baval chal raha hai. Prabhakaran isake pramukh neta hain. Prabhakaran kya chahatey hai ? yahi vah samasya hai jise koi bhi desh pasand nahin karega, isis karan se Narvey ne aage koi kadam madhyastata ke liye nahin uthaya. Rajiv Gandhi ne bahut utsah ke saath Shri Lanka ki samasya ke samadhan ke liye bahut prayas rat dikhe, unake oopar shri lanka ke ek sipahi ne apani banduk ki bat se sir par prahar kiya, rajiv baal baal bache , varana agar sir mein gahari chot pahunchati to unaka usi samay kaam tamam tha, lekin ve subhagya se bach gaye.

 

Saubhagya hamesh saath nahin deta. Is hamale se bache to unake oopar Litte ne hamala karaya , jise sabhi jaanate hain. Ve hame hamesh ke liye chchod kar chale gaye. Unaki suputri Priyanka Badera abhi haal hi mein apane pita ki ek hatyarin se milane chupake chori chchipe milane ke liye south india ki kisi jail mein gayi thi. Kisliye gayi thi aur kyon gayi thi , yah to vahi jane, uddeshya kya tha, kisane motivate kiya yah bhi sab vahi janati hongi.

 

Litte ab itani karyavahiyan kar chuka hai, jisase shri lanka ki sarakar shayad hi unake formule ko manein, mera khayal hai ki sarakar litte ko thaka dene wali niti par chal rahi hai, ki kitana ladenge, kitane samay tak ladenge ? Umra ki seema hoti hai, phir pata nahin jo koi doosara Prabhakaran ki jagah le, use unake followers mane ya na mane, uname hi unake sangathan mein hi darar pad jaye ya phhoot pad jaye, jisaka phayada Shri Lanka Sarkar ko mile. Isiliye Shri Lanka sarkar har us varta se kanni kaat rahi hai, jo desh mein algavvad ko badhava de.

 

Is samasya ka tatkalik koi samadhan nahin dikhata hai. Dono paksha apani jagah ade huye hain. Aise mein kahin batchit ki koi darar nahin dikh rahi hai, jo kisi samasya ka samadhan ho.

 

Vartaman mein chuhe billi ka khel chal raha hai. Shri Lanka ko ashant karane mein bhale hi litte asar dale, lekin in sabaka prabhav asardar nahin lagata hai. Shri Lanka sarkar bachav ki mudra aur attack ki mudra mein jarur nazar aati hai, aur philhal yah niti sahi lagati hai. Shri Lanka sarkar ko litte vidrohiyon se nipatane ke liye chal rahi nitiyon par hi amal karana chahiye. 

Rajya sabha mein hangama

Jab swarth ke liye aur apane phayade ke liye rajniti ki jayegi to yahi hoga. Minsiteron ka yah hall hai ki sifarish ke liye prime ministers ke office se aath aath bar reminder bheje jayein ki kaam kar diya jaye. Ek ya do dafa reminder bhejane ki baat to samajh mein aati hai lekin itani sankhya mein reminders bhejana shak paida karata hai.

 

Darasal  hamare khoon kein hi dogala pan bhar gaya hai. yah kisi e ne nahin bhara hai, yeh sab bhara hai netaon ne. Netaon ne apane swarth ke liye jitane bhi niche girane ka star tha vahan se bhi niche jane ke liye taiyar baithe hain, bas unhe vote bank chahiye, jo ikattha karake unako dubara gaddi par baitha de. Yahi khwahis har neta ki hai, ise koi kyon chchodana chahega.

 

Apana phayada kisako achcha nahin lagata, sabako apana phayada priya hai, koi ab imandar raha hi nahin hai, mujhe nahin lagata ki is vartaman pidhi mein koi imandar vyakti bacha ho, Ham sab andar se chore ho chuke hain. Jahan jisako jaisa mauka mila usane batorana shuru kar diya, yah sab hamare naitik giravat ka namuna hai. Sabhi Hindustaniyon ka yahi hal hai.

 

Ab is tarah ki chori chakari ko netaon ne manyata de di hai, isaliye yah to badhega, ise koi rok nahin payega aur na hi kabhi khatma hoga, yah bhrastachar anant kaal tak chalata rahega, kyonki ab yah hamare khun aur hamari jeans mein aakar ghus gaya hai. Is samay agar koi bhrastachar mitane ki baat bhi karata hai, to mujhe bahut habsi aati hai aur main ise duniya ka sabase bada majak kahata hun.

Nepal ke baare mein sabhi deshon ki chuppi ka matalab

Nepal mein election ho chuke hain, election ke results bhi samane aa gaye ain. Abhi tak kuchch gine chune deshon nein vahan ke halat ka jayaja liya hai. Stithi bahut gambhir ho chuki hai.

America ne apani pratikriya officially nahin bayan ki hai. Yah sach hai ki Maovadiyon ko atankvadiyon ki suchi mein daal diya gaya tha aur jin deshon mein maovadi sakriya rahe hain, vahan ki sarakaron se kaha gya hai ki ve isake khilaf jo bhi karyavahi ho sakati ho vah karein. Sanyukta rastra pahale hi atankvad vad ko avaidh ghosit kar chuka hai.

Ab chunki maovadi kisi desh mein , stta par aa chuke hon, vahan bahut soch sambhalkar koi desh apani pratikriya dega. America ne kaha hai ki vah maovadiiyon ko atankvadi sangathan manta hai, lekin ve satta mein yadi aaye hai, to ve pahale unake karya kalapon ko samjhenge, aur ve usaka intazar kar rahe hain.

Nepal ab asia k e liye ek khatarnak desh ban chuka hai. Bharat ke niyantran Nepal ke netaon se khatma ho chuka hai. Bhutan se usaka koi matalab nahin. Pakistan aur china se jaroor hai, kyonki atankvadi ek doosare ko sahayog karne ki stithi mein hai, aur yahi sabase bada sahayog hai,

Ab jo stithiyan banegi unako samajha lena chahiye. Agar maovadi satta mein aye, to sabase bada khatra Bharat ko hoga. Bharat ke alawa Asia mein America ka hastapchchep aur adhik badha jayega. America to chahega hi ki usaka dakhal Nepal mein aur jyada badhe. Maovadiyon ne isaka avasar americano ko de diya hai. America Nepal mein ghusakar China ki sidhe sidhe ghera badi karega, pakistan mein vah kar hi chuka hai, Asia mein use apane pair pasarane hai, yah use achcha mauka mil gaya hai. Atankvad ki aad lekar america Nepl par kabha jamane ka safal prayas kar lega. Iraq mein jame rahakar america asia mein ghus jaroor aya hai. ise khadedana namumkin to nahin , lekin america hatega to apani ichcha se. Pakistan se abhi vah jaldi hatane wala nahin , jab tak Osama use mil nahin jata, ab Nepal ki bari hai, ye chchote desh America ke samane kitana tik payenge?

Nischay hi maovadion ki aad lekar america nepal mein ghusega, ki use tankvad khatma karana hai, us samay Nepal ki sadakon par Maovadi nahi dikhenge, America ki sena hi nazar ayegi.

Nepal ke longo ne bahut bachakana kam kiya hai. Nepal ke logon ne apane pairon par kulhadi mari hai, isaka khamiyaha Nepal ke log to bhugatenge hi, is chchetra mein aane vale sabhi desh bhugatenge, China apani kahir manave, kahin America naam ki bimari usake border par na pahunch jaye?

Abhi sabhi desh chup hain , unhone apane patte nahin khole hain. Ve shayad dekh rahe hain ki maovadi apana kaun sa kadam aage uthate hain .

Mere hisab se Maovadiyon ko agar Nepal mein Satta sambhalini hai to ve

1- Pahale Hinsa ka rasta chchodein

2- Vishwa samuday kya chahata hai, usaka samman karein

3- Democracy ke prati samarpit hon

4- Bevajah ke takarao ko bachane ki koshish karein

5- Vartaman Raja ka samman karein, aur usako Rastra mein sammanjanak sthan dein,

6- Vipakshshi dalon ke vicharon ka samman karein

7- Desh ki janata ka ksi party ke prati kya rujhan raha, kitaney voters kis party ke rahe, jan samuday ki in bhavnaon ka aadar karein

8- Maovadi neta jo bhi bayan jari karein , unako apane bayano par sakaratamak pahal ki bhavana jhalakane ki baat samane aani chahiye

Mera khyal hai, Nepal ke sabhi neta is baat ko samajhenge. Jangalon mein rahakar andolan chalan aur sabhya samaj mein aakar Desh chalana dono juda juda batein hain.

Jyotishiyon ka mayajal

Andha vishvas sabhi deshon mein kamoveshi ek hi tarah ka hai. Kisi desh mein jyada ho sakata hai, aur kisi desh mein adhik, lekin andha vishwas hai jaroor, isaliye ki yah manav swabhav se judi hui ek tarah ki manasikata hai, jo hamein kisi na kisi roop mein santusht karati hai, bhale hi kuchch palon ke liye ya dinon ya mahinon ke liye.

 

Jyotish kuchch isi tarah ka maya jal hai. Bharat desh mein to sara kam hi jyotish par adharit hai. Janma se lekar maran tak jyotish Bharat desh mein apani jadein jamaye huye hai. kuchch had tak jyotish ka ek swaroop theek kaha ja sakata hai aur use manyata di ja sakati hai, lekin jyotish ke kai pakshshon ko swikrat ya manya nahin kiya ja sakata hai.

 

Yah sahi hai ki grahon ki chal space mein kahan par hai, kitani hai, kis speed par hai, kaun si rashiyon mein hai, Grahon ki is chal ke vibhajan ka swaroop manya kiya ja sakata hai, lekin jab jyotish ka prayog prediction ke liye upayog kiya jata hai to yah bahut kuchch swikar aur manya nahin kiya ja sakata hai. Isamein khamiya hi khamiya hain aur sachai kuchch bhi nahin hai. Ho sakata hai ki 1000 vyaktiyon mein kisi ek ko kuchch prapta ho gaya ho, jaisa ki jyotishiyon ne  bataya ho, lekin aisi sambhavana  achanak hi ho sakati hai ISE BY CHANCE BHI KAH SAKATE HAIN.

 

Maine Jyotish ka bahut gaharayi se adhyan kiya hai, sabhi prapta classical books ka adhyayan kiya hai , Hindi aur english bhasa ki jyotish vishayak pustakon ka soochchma se soochchma adhyan kiya hai, lekin prayah sabhi pustakon mein kuchch general prediction, jinhen ham common prediction kah sakatey hai, kuchch seema tak sahi ho sakata hai, lekin isake alava koi vishesh baat jyotishi nahin bata sakatey hain.

 

Jyotishion ke paas bahut se bahaney hain, ek yah ki “aapaki kundali sahi nahin bani hai” doosara, “Apaka birth time theek nahin hai, galat ho sakata hai”, teesara”Kundali banane ke ayanamsa mein farka hai, banaras ka patra aur mumabi ke patre mein fark hai” chautha “birth place galat hoga, usaki stithi ka theek se shodhan nahin kiya gaya hoga”, tarah tarah ke bahanein banaye jate hain, aisa isaliye ki ve aapake aage jhukane ya jyotish ki kamiyon ko ujagar karana nahin chahatey hain. Ek jyotishi dusare jyotishi ko saport karata hai, doosara teesare ko aur yah silsila logon ko ulloo banakar apani jebein bharane tak barabar chala karata hai.

 

Jo inake pas jata hai, vah kuchch dinon tak apane man muaafik kaam ke liye bhatakata rahata hai aur apane bure samay ko jab tak tal raha hai tab tak talata rahe, is siddhant par chalata rahata hai. Jab kaam nahin banata to phir kisi doosare ki sharan mein jata hai. yah silsila chalata rahata hai.

 

Maine jyotish ka adhyan bhi kiya aur jyotis visharad ki pariksha bhi uttirn ki, isaki practice bhi ki aur badi ganit lagayi, jaisa maine oopar kaha hai, prediction sahi sahi kabhi nahin kiye ja sakatey.

 

Mujhe doosare jyotishion ne meri kundali dekhakar RAJ YOG bataya tha, bade bade sapane, ye hoga , vo hoga, phalani umra mein yah samrajya mil jayega, aisa bada kaam ho jayega ki aap ashcharya karenge, yahi lolly pop jyotish ke dekhatey dekhatey 64 varsh bit gaye, kuchch nahin hua, jama punji bhi chali gayi, ladke, ladkiyon ki shadi mein jamin jaydad aur gahane jewar tak bechane pad gaye, jyotishion dwara bataye gaye sare kaam phel ho gaye, kisi mein bhi safalata nahin mili, ant mein mujhe is umra mein naukari karani pad rahi hai, ye sab kisi jyotishi ne mujhe nahin bataya tha.

 

Ab main puri tarah se ishwar ki sharan mein hun, kyonki yah satya mujhe gyat hua ki , jo oopar wala chahega wahi hoga, wahi kewal bhagya janata hai, use hi pata hai ki kya hoga aur kya hone wala hai, isaliye hame sab kuchch usi par chchod dena chahiye aur apane karma mein ji jaan se jute rahana chahiye. Phal uparwale ke haath mein chchod dena chahiye.  

Ayogyata hi yogyata ka parameter

Aarakshan hona aur arakshan karana bharat desh ke liye bahut badi bimari hai. Jis uddeshya  ke liye arakshan samvidhan ke undar samahit kiya gya tha, us samay isaki mool dharana  yahi thi ki , dabe kuchale logon ko kanun banakar aage laya jay, isake liye  is bhavana ko kanuni jama pahanaya gaya. Samvidhan mein ise kewal das varsh ke liye lagu kiya gaya tha, lekin  baad mein is bhavana ko vote bank ke liye jode diya gaya.

 

Jativadi rajniti ka sabase pahale aagaz Chaudhari Charan singh ne shuru kiya. Unhone pahali baar Police vibhag mein Jaton ko khub achchi sankhya mein bharati kiya aur baki samaj ke logon ko ullu banatey rahe. Chaudhari Charan singh pahale opportunist neta bane, jinhone apane phayade ke liye congress chchodi aur Bartiya Kranti Dal ke naam se parti banayi, jisane sabase pahale is desh  mein chchetravad ki rajniti shuru ki. Yah bimari shuru karane ka shreya Chaudhari Charan singh ko dena chahiye, ab yahi bimari infection ki tarah se sare desh mein fail chuki hai.

 

Aarakshan kya shuru hua , ab to sabhi jatiyan arakshan maang rahi hain. Yah maang kahan tak jeyegi, isaka koi ant nahin dikhai deta. Lekin Arakshan sabke liye khatarnak hai, swayam unake liye bhi jinako yah mil raha hai. Sarakari naukari mein stithi jo bhi ho, main usake baare mein jyada nahin kahoonga, lekin yadi private sector ki baat ki jaye to yahi aarakshan unake liye jaharila sabit hoga, kyonki jo koi bhi employment dega , vah yah bhi chahega ki usaka employee bahut kabil ho aur unake vyapar aur paisa kamane ke liye upayukta vyakti sabit ho. Efficiency private sector mein bahut jaroori hai, apane yahan kaun bevakoof aadami ko naukari par rakhana chahega. Sarkar agar kuchch karegi to adhakachare gyan vale ki samsya se kaun nipatega, isaliye sarkar bhi har kadam phoonk phoonk kar rakh rahi hai.

 

Main jahan kaam karata hun, ve OBC ko belong karate hain. Ye sab arakshan ka phayada utha rahe hain. Ye kreamy layer vale log hain, jinaki rahan sahan ka star achche achche sawarno ko bhi nasib nahin hai. Aise logon ko yadi supreme court arakshan ke dayare se bahar karana chahata hai, to sarkar ko koi etraj nahin karana chahiye.

Nepal ki chhichhaledar

Nepal ke nivasi bhale hi socha rahe hon ki ve Raj tantra ko khatma karake koi bada tir mare le rahe hain to yah unake liye ek bahut kharab sapane jaisa hi sabit hoga. Vastavikata yah hai ki jo bhi chunav huye hain, ve sab ke sab is baat ko lekar huye hain ki Raja ko kaise hataya jay. Is baat ko lekar sari takat jhonki gayi aur yahi ek sutri karya kram tha. Yahan Nepal ki janata se sabase badi bevakoophi yah hui ki usane jo bhi matadaan kiya vah sidhe sidhe democracy ke khilaph diya, aur Rajshahi ke against mein diya.

 

Rajtantra khatam karake Nepal ne apane pairon aap kulhadi mari hai. Mao vadi sare nepal ko loot khasote karake kngal bana denge, yeh to khud hi bhukhe nange hain, bhukhe nange the , ab jab yah satta mein aa rahe hain to loot khasote to machayenge hi. Inhe koi aisa karane se rok bhi nahin payega. Vaise bhi nepal ke paas Prakratik sansadhan bahut achche nahin hain, Parvatiya desh hone ke karan yahan samatal bhumi bhi nahin hai, jo bhi hai vah , bharat ki sima se lagi hai, jangal hain aur prakratik vatavaran hai, isake alava kuchch bhi nahin hai.

 

Kuchch saal poorva nepal se taskari hoti thi, bahut sa saman videshi bharat ke bazaron mein aya karata tha, lekin global market ke chalatey isaka bhi potential khatma ho gaya hai. Ab sabhi deshon ka saman sabhi jagah mil jata hai, isliye yah sambhavana bhi na ke barabar hai, ki nepal se taskari ki ja sakati hai. Industries vahan hai nahin, jo bhi hain , ve antarrastriya star par ho rahe mukabale ko comptete nahin kar sakati. Shiksha ka star bagut kharab hai, swasthaya sewayein bhi bas mashaallah hain.

 

Is uthal puthal ke bich koi bhi niveshak aise anischitata ke mahol mein apana kimati paisa kyon lagayega aur ayon lagana pasand karega ? Is desh mein nivesh karana khatare se khali nahin hai, kab maovadi ultimatum de dein ki hamara desh khali karo. Is liye suraksha ki gauranti kaun dega ?

 

Maovadi loot, khasote, mardhar, nangai, luchchai ki manasikata vale log hain. inake upar  vishwas nahin kiya ja sakata hai, ye chahe kitana bhi vishvas dilayein, in par bharosa katai nahin kiya ja sakata hai, inake bade se bade neta kuchch bhi kahein, inhe baat badalatey der nahin lagegi. Phir neta ki baat kaun sunega jab asali kaman maovadi cadre ki ho. Akhir maovad jinda rahega to unake karyalrtaon par, neta akele kya kar lega.

 

Mujhe shak hai ki Nepal kabhi tarakki kar payega, kyonki Vishwa biradari main, is samay maovad ka kahin bhi sthan nahin hai. Jinake haath mein satta ayegi, ve Democracy ke viparit dhruv ke manane wale log hain. Jo bhi referendum napal ke logon ne diya hai, vah rajtantra ke khilaf gaya hai, jisake sath mein democracy bhi shamil hai. Isaka matalab yah nikala jay ki nepal ki janata ne Democracy ke khilaf bhi vote kiya hai. Dhyan dein, ki maovadi kabhi bhi democracy par vishwas nahin karate hain.

 

Adhiktar nepal ka vyapar marvariyon ke haath mein hai. pahle to taskari aur paryatan se aay hoti thi, lekin ab isaki bhi ummid khatma ho gayi hai. Paryatak ab apane aapako  asurakshit samjhenge, pata nahin kab maovadi unaka apaharan kar baithein , aur unako chchodane ke badale mein ool jalool maang kar baithe. Ab taskari karane ka bhi koi potential nahin rah gaya hai, sivay un chijon ke, jo pratibandhit hain, jaise ki Hathiyar.

 

Kul milakar Nepal Desh ke haalat bahut sukhamay nahin kahe ja sakatey hain. Aane wale dinon mein Nepal bahut bure daur se gujarega, yah ashanka balavati hoti ja rahi hai.

 

Ham kya karein:

1- Maovadiyon ke aane se nishchay hi bharat ke maovadion ke hausaley badha chuke hain, inhe apane hi desh ke chand rajnitik dal hava dene mein bhi lage hain. hamein turant Nepal ki seema par taron ki baad lagakar nepal se lagi sari seema ko band kar dena chahiye aur Border security force ki tukadiyan lagakar avajahi rok deni chahiye, is ghuspaith se hamein khatara hi sakata hai. Jis tarah se Netaon ke bayan aa rahe hain, usase yahi lagata hai, hamein aaj nahin to kal yah kaam karana padega, isaliye behatar hai, bad ka kam jaldi se jaldi kar liya jay

2- Hathiyaron ki taskari nepal se bdhegi, ise roka jana chahiye

3- apane desh ke maovadi ugravadion ko chori chchupe nepal ke maovadi sahayata jaroor pahuchane ki koshish karenge, inake neta chahe jo bhi kahein, in par bharosa nahin kiya ja sakata hai.

Nepal ki janata ne Maoadiyon ko satta mein lakar apane pairon aap kulhadi mari hai, yahi janata bhale hi aaj khush ho, lekin aane wale dinon mein unake liye sankat hi sankat hain, kyonki vishwa viradari  aur visheshkar prajatantrik desh maovad ke khilaf hain aur ise koi bhi prajatantrik desh phalane phoolane nahin dena chahata hai.

Mujhe to nepal ke barbadi ke lakshan samajh mein aate hain

Dainik Jagaran : Swargiya sampadak Shri Poorna Chandra ji se judi yaadein

Dainik Jagaran , jise aaj ke din  hindi bhasa ka sabase adhik padha jane wala akhabar hone ka gaurav prapta hai, isake shaishav kaal ki baat karata hun. Un dinon mein Dainik Vishwamitra, Dainik Pratap, Dainik Vartaman, Dainik Jai Bharat , Dainik Vir bharat aadi aadi akhabar Kanpur se nikalatey the. In sab akhabaron mein Hindi Bhasa ka akhabar Dainik Vishvamitra sabase adhik padha jane wala akhabar tha. English ke akhabron mein, The Telegraph, Pared, Mall road se nikalata tha, aur dainik vishwamitra, naronha chaurahe ke pas se , shahar ki sabase prasiddha sadak mall road se chchapakar nikalata tha.

 

Mujhe yaad hai, ki Dainik Jagaran jab pahale din nikala tha, tab kisi ne bhi nahin vichar kiya tha ki yah akhabar itane lambe samay tak chal bhi payega ya nahin. Kyonki un dinon mein bade banner ke akhabar Vishwamitra, Pratap, Vir Bharat ko pachchadana asan kam nahin tha, ye sare akhabar bahut established akhabar the aur inase takkar lene ke liye bahut energy, bahut badi policy, aur sabase badi baat janata ko apane pakshsha mein mod lene ki thi. Yah kaam bahut asan nahin tha.

 

Hindi bhasa ke doosare akhabar Navjivan , Lucknow se chchapakar aata tha tatha  Dainik Hindustan aur Nav Bharat Times Delhi se chchapakar sham ko Dak edition padhane ko milatey the.

 

Saptahik akhabaron mein Ram Dularey Trivedi Ka Tankar aur Saptahik Sahayogi aur doosare saptahik padhe jatey the. Delhi ka sapatahik hindustan aur Bombay ka Dharmayug prasiddha magazines thi. In sabako kanpur ke log padhatey the.

 

Mere Pita ji akhabron ke padhane ke bahut shaukin the, unhe Vishwamitra akhabar padhana pasand tha aur ve Vishwamitra akhabar subah mangakar padhatey the, shaam ko vir bharat sandhaya kalin akhabar padhatey the. Is akhabar ko “aj to gazab ho gaya” chillakar hakar log bechatey the. Jab yah akhabar hakar bechatey they to sare mohalley mein halchal si mach jati thi.

 

Jab pahaley din Jagaran akhabar chahpa to usake bare mein longon ko koi vishesh utsukata nahin hui, karan yah tha ki adhikatar log vishwamitra, pratap, navajivan aur doosare akhabar padhane mein ruchi rakhatey the.

 

Adhikatar Kanpur ke Patrakaron aur chchutbhaiye Rajnitigyon ki ray thi ki Dainik Jagaran jyada din nahin chal payega aur jaise doosare akhabaron ka hashra hua hai vahi hoga.

 

Lekin kalantar mein sabake kayas aur kalpanayein dhool mitti mein mil   gayi aur jo log aisa socha rahe the vah kabhi hua hi nahin.

 

 

Main chahata hun ki main apane vichar rojana likhoon, lekin………..

Sab kuchch chahane se to kuchch bhi nahin hota, main chahata hun ki main rijana apane vichar aapako likhoon, lekin jaisa ki maine aap sabako bataya ki main ek bahut sadharan vyakti hun, jis computer se main aap sab logon tak aata hun, yah mera nahin hai, jis internet connection se main aap sab tak pahunchata hun, yah bhi mera nahin hain, lekin mere dil mein chah hai aap logon tak pahunchane ki, isaliye maine raah bhi bana li hai, jisaka yah computer hai, vah is baat ko samajhata hai, mere vicharon ki ijjat karata hai, isaliye unhone mujhe thode samay ke liye apanae internet connection ko mere liye baant diya hai, isi ke jariye main aap sab tak pahunchata hun.

 

Mujhe khud nahin pata ki yah silsila kab tak chalata rhega, main 5000 hazar rupaye ki naukari karata hun, is samay meri umra retirement ki umra se 4 ya 5 varsha jyada hai, mujeh bhi aaram chahiye , jaisa ki is umra valon ko chahiye, lekin shayad yah sab mere nasib mein nahin hai, main kabhi nirash nahin hota, hamesha hausala banaye rakhata hun, yah sab main pichchale 50 se jyada varshon se dekhata chala aa raha hun, maine Panditon , Jyotishiyon, dharma sthalon par jakar apani aur apane parivar ke liye shubh shubh hone ki prarthana karata raha, lekin sab vyartha raha, main kuchch bhi hasil nahin kar paya.

 

Maine do baatein mukhya roop se observe ki hain:

1- Karz ne mera pichcha nahin chchoda, hamesha laga raha, abhi bhi laga ha, mujhe ICICI bank aur HDFC Bank ka agale sava do saal tak kishtein deni hain , jo pratimah lagabhag 17 hazar se adhik ki hoti hain, yah kishatein main apani tanakhvah aur apane bete ki tanakhvah se deta hoon, isake liye mujhe atirikta parishram karana padata hai, taki bank se koi bhi shikayata na mile.

 

2- Durbhagya ne mera pichcha kabhi nahin chchoda, mujhe kabhi subhagya ke darshan kabhi nahin huye, log kahate hain har vyakti ke jivan mein , ek samay aisa aata hai jab vah usaka peek period hota hai, meri to jindagi gujar gayi is peek period ko dekhate dekhate, abhi tak to nahin  aaya hai , aage ka to bhagawan malik.

 

Jindagi ne katu anubhav diye hain, aur shanti ke bhi anubhav diye hain. Itana sab hote huye bhi , chahe paristithiyan anukul hon ya pratikool hon, maine hausala jaroor banaye rakha hai. Bahut badi badi samasyayein aayi , lekin main kabhi vichalit nahin hua, ishwar ek darwaja band karata hai to doosara khole deta hai, doosara band karata hai to tisara khole deta hai, manav jivan mein kathinaiyan hi kathinaiya bhari hyi hain, inase kabhi ghabarana nahin chahiye, meine isi formule ko apanaya aur main vipattiyon ko jhelate jhelate manasik roop se apane ko taiyar rakhata hun.

 

Ye sab jivan ke rang hain, agar yah sab naho to jindagi bina rang ke ho jayegi, jindagi mein thoda sa krodha, thoda sa kaam, thoda sa irsha, thodi si jalan , thodi si dushamani, thodi si mitrata, thodi si sahanubhuti, thodi si karuna, thodi si daya, thoda sa pyara hona chahiye aur har ek manobhavon mein barabar ka balance hona chahiye, aisa karana koi kathin kaam nahin hain,

 

Main aksar dekhata hun , log kisi bhi vajah se Atma Hatya kar lete hain. Atma hatya karana kayaron aur bjdilon ka kaam hain, iswar ne jindagi puri jine ke liye di hai, jivan mein utar chadhav aate rahatey hain, inako jhelana chahiye, aur kabhi bhi nahin ghabaran chahiye.

 

Maine aap tak aane ka rasta chuna, aur main aap tak aata hoon , aata rahunga. Thik hi muhavara kaha hai “jahan chah hai, vahan raah hai”  

Kanoon unake liye hai jo kanoon se darate hain

Bharat desh mein kai tarah ke kanoon chalatey hain. Inaki ginati haath ke poron par nahin ki ja sakati hai. Har jagah, har ghar, har gaon, har kasabey, har shahar har rajya sab jagah kanoon juda juda hain aur , dabang, nange luchhon, gundon, dadaon  aadi aadi ne apane apane tarike se desh, kal, paristithi ke hisab se kanoonon ka nirman kar liya hai. Ye ve kanoon hai jo kisi kitab mein nahin milate, yah sab dabango ki marji par banatey aur bigaratey aur phir suvidhanusar bana liye jatey hain. Makasad isake pichche sirf ek hai, ki yen ken prakaren apana phayada kaise socha jay, jisasey rakam bhi mile aur dabdaba bhi.

 

Kisi bhi gali muhalle mein chale jaiye, pani aur watage bahaney wali nali , jisase sabhi gharon ke pani ka nikas hota hai, makan ke malikon ne nali apane andaz mein paat kar sadak par karake, makan dookan banaye daal rahe hain, koi apana chabutara aage badhakar banaye le raha hai, usako is baat se koi pharak nahin padata, ki aane jaane ke liye sarakar dwara chchodi gayi sadak aur kitani sakari ho rahi hai, makan malik isi mein khush hai ki usane aage divar khadi karake jamin par kabja kar liya hai.

 

Aise saikadon, hazaron udaharan ginaye ja sakatey hain aur ham rojmarra ki jindagi mein bhi dekhatey hai.

 

Lekin sabhi khamosh hain. Kyon?

 

Kanoon sirf aur sirf usake liye hai jo kanoon se daratey hai. Jo kanoon se nahin daratey hain aur kanoon ko thenga dikhatey hain, ve hi maja kar rahe hain, kyonki unaki dbangai ke aage sabhi bhigi billi ban jatey hai, chahe vah koi bhi ho.

 

Hamare andar na to ichcha shakti hai, in sab chijon se nipataney ke liye, kyonki ham andar aur bahar se sochatey hain ki “in sab kamon se hamein kya nukasan ho raha hai”

Khane ki chison ki Kimatein badhane ke karan

Khane pine ki chizon ke badha rahe damon ke pichche mujhe kuchch karan nazar aaye hain.

 

Pahala yah ki vartaman maujud sarkar ne khane pine ke kaam aane wali vastuon ko sattebazi ke ghere mein le aaye hain. sattebazon ya sidhe sidhe kahein juariyon ko apane jua khelane se matalab, unaki doosaron se kya lena dena, kaun bhukha mar raha hai, jinda hai ya murda, sattebazon ko apani rakam se matalab. Maujuda sarkar nein khane pine ki zinson par satta karawana shuru kar diya jis karan ab khane ki chijon par daam sthir karane ka adhikar in satte bazon par aa gaya, isaliye khane ki chizon ke daam badhe hain.

 

Doosara, zamakhoron ko muka mila gaya, is maang aur aapoorti ka aankada barabar karane ka, kuchch din ki crisis ka in zamakhoron ne achanak phayada utha liya hai.

 

Teesara, zaroori chizon ka niryat aapoorti ki vajah se khane ka saman export ho raha hai, isaliye apane desh mein kami hui.

 

Chautha, phasal jab nai aayegi , tabhi kuchch rahat mil sakati hai, jab nai phasal market mein aayegi tabhi saman ki thodi bahutayat se daam kuchch niche  gir sakatey hain, lekin isame abhi vakht lagega.

 

Panchava, opportunist har jagah aise mauke par daam na bhi badhe hon, tab bhi badha kar vasul karatey hain, yah lootmar ki prabratti dam aur badhati hain.

 

Karan kya chahiye ?

 

1- Utana hi kharidein , jitana jaroori ho, anavashyak stock na karein

 

2- Bahut mahanga saman na kharidein, sastey se bhi kaam chal sakata hai

 

3- Anavashyak vastuon aur mahangi khane ki chizon ko rokein, bachche nahin mantey to unaki ichcha apani haisiyat ke anusar kam se kam poori karein. Bade log apana kharcha kam karein

 

4- Aaane wale chunav mein aisi sarakar na chune, jo apake liye itani musibat ka pahar khada kar de.