sansar ko dekhane wala

Pakistan ke neta kya karein

Pakistan mein election ho chuke hain. PPP aur Nawaz sharif ke dalon ne kahdit janadesh prapta kiya hai. trishanku common house ban gaya  hai. badi vichitra stithi hai. musharraf ka mamala bhi bada pechida sa hai.

mere vichar se miyan musharraf ko abhi apane pad par bane rahane dena chahiye. kyonki vahi ek kadi hain jo purani aur nayi stithion ko kuchch had tak sambhaal sakate hain. Musharraf bahut kuchch jhel chuke hain, isaliye unhe abhi kinare lagana buddhimani ki baat nahin hogi. Musharraf ke bare mein Pakistan ke rajnitigyon ko abhi kuchch nahin socahana chahiye, inhe abhi jas ka tas stithi mein rahane dena chahiye.

Sabase aham sawal yah hai ki pakistan ke rajnitigya kitani jaldi democratic sarkar bana sakate hain. Isame deri hone se unaka rajnitik nukasan hai. ise bachana chahiye. Nawaj sharif aur jaradari dono ko sarakar milakar banani chahiye. Yahan aham ki bhawana ka koi sthan na ho. Mukhya baat democracy ki hai. ise bachana sabhi rajnitigyon ka farz hai. Prime minister koi bane , yah itana mahatwa poorna nahin hai jitana mahatwa purna yah hai ki sarakar kaise jaldi se jaldi banayi jaye. deri se sarkar banane ka matalab yah nikala jayga ki sarakar gathan ke mamle mein rjnitik dalon mein marakat kisi mudde ko lekar chal rahi hai.

Pakistan ki janata nei rajnitik dalon ko democracy ke pakshsha mein vote diya hai, is sachchai ko sabhi ko swikar karana chahiye aur jald se jald sarkar banana chahiye. Masale  baad mein bhi suljhaye ja sakate hain.

Fauri jarooart sarakar banane ki hai.

Gandagi kab door hogi

Mujhe aksar bahar ke shaharon mein jana padata hai. Kabhi dilli, kabhi mumbai, kabhi rajasthan ke shahron mein, kabhi dakshin ke shaharon mein. Uttar pradesh aur bihar, bengal ke shararon mein amooman bahut gandagi hoti hai, yahan ke log safai pasand  kam lagate hain. yahi hal kamoveshi madhya pradesh, maharastra ke shaharon pe lagoo hoti hai. lekin madhya pradesh aur  maharastra ke kuchch shaharon mein safai bhi dikhai deti hai. Gujarat ke log safai pasand lagate hain, isiliye vahan gandagi kuchh kam nazar aati hai.

Mujhe lagata hai ki safai karmachari bahut haram khor ho gaye hain. ye gandagi na saaf karane ke karan, paroksha athava aparoksha roop se bimariyon ko nyota de rahe hain.  aaj jitani bhi kathin bimariyan nazar aa rahi hain, vah nishchaya hi kuchch na kuchch gandagi ki den hain. masalan asthama, phephadon ki takalifein, pet se sambandhit rog, jo saaf pani na milane ke karan aur adhik badha rahe hain.

Ab isaka kya ilaj hoga ya hona chahiye ? chanakya ka sujhav hai ki berojgaron ko safai ke kaam mein lagaya jay, yah thekedari ke antargat kiya ja sakata hai. Ilake ko baant karake nali ki safai, sewer ki safai sadak ki safai ka kaam ityadi berojgaron ke jhund ko yadi saup dete hain to isase naujawanon ko rojagar to prapta hoga hi, nagarik bhi jaroorat ke anusar bina kisi lag lapet ke inhe bula kar safai ka karya kara sakenge.

Nahin to mujhe ek sher isi baabat kahana padega ki:

Saki sharab pine de, nali mein baith kar,

ya vah jagah bata de , jahan gandagi na ho

Mahangayi phir badhegi

Mahngai koi bhi sarakar nahin rok sakati , is satya ko sabhi desh vasiyon ko swikar kar lena chahiye. Agar koi yah kahata hai ki vah mahngayi ko rok lega to vah aap sabako bevakooph bana raha hai. Agar pragati karani hai to , mahangayi jarur hogi. Kyonki paisa to sabako chahiye. Ek din ke bhojan kar lene se sari jindagi ki bhookh to mit nahin jati, isi tarah se desh hai. Agar desh ki sehat ko maintain karana hai to , mahagayi jaruri hai.

Yah mahangayi bade kaam ki cheej hai. Jo kam badi badi sarakari yojanayein nahin kar saki, vah mahagayi ne kar diya. Sabaase pahali lagam lagi janasankhya par. Logon ne knya bhrun paida karana band kar diya. Isake bahut achche parinam milenge, lekin kuchch varshon ke baad. Bade parivar ki klapana ab sapana ho chuki hai. Log mahangayi ki vajah se bachche kam paida kar rahe hain. Kam parivar hain jinake char paanch bachche honge.

Mahangayi ki vajah se Parasi samaj ki jansankhya ghat rahi hai. Main aksar logon se unaki ray liya karata hun. Mahangayi agar isi tarah se badhati rahi to jeena muhal ho jeyega, is stithi ka phayada bhi hai, log sochenge ki unhen kya karana theek hoga. Aafat aati hai, to sahi rasta chunane ka mauka bhi milata hai. Ise nahin bhulana chahiye.

Bhasa Gyan

Mujhe kai bhasaon ka gyan hai. Apni hindustani bhasaon mein mujhe punjabi, gujarati, bengali, marathi aati hai. Dakshin ki Telugu aur tamil mein agar do log baat kar rahe hon to main thodi thodi samajh leta hun ki ve kya baatein kar rahe hain. Bahsa gyan seachcha yah hai ki aap sahitya, logon se parichay, unake vichar bahut acchhi tarah se jaan aur samajh lete hain.

Videshi bhasaon mein mujhe, german, english, russian aur french aati hai. kuchch bhasa main bole leta hun kuchch samajh leta hun. Perfect main english aur german mein hun. Isi tarah panjabi main perfect hun lekin dusari bhasayen padh aur samajh leta hun , kuchch bhasayen main bol aur likh nahin pata.

bachpan mein madarase mein padhane jata tha , vahan par munshi ji urdu padhatey the. Urdu ke lafja abhi bhi mujhe yaad hain , lekin main ab urdu bhul chuka hun aur likh bhi nahin pata, lekin urdu ke lafjon ko main samajh leta hun.

bhasa gyan jitana hi adhik hoga utana hi achcha hota hai.

Rajnitigyon ki dukano ka sach

election aa rahe hain. Rajnitigyon ne apani apani kamarein kas li hain. Yen ken prakaren unako jyada se jyada seatein kaise milein, isake liye loke lubhavan karyakramon ki bauchchar ki jaa rahi hai. Chara phenka ja raha hai. Bajat mein election ko dekhate huye chidambaram kaun si door ki kaudi la rahe hain , yah to loksabha mein hi hoga, lekin jo kuchch janata ko jhilavana tha ve sab pahale hi teen chauthai kar chuke hain, yani petrol, gas aur doosari chijon par. Vat lag hi chuka hai, baki kasar chidambaram ka bajat kar dega.

Koi bhi is mugalate mein na rahe, ki mahngai tham jayegi. Is tarah ki jhanse bazi mein kabhi nahin aana chahiye. Satya yah hai, ki oopar oopar sabhi dal noora kushti mein lage raheinge, pisana janata ko hai. Vikas karana hai to mahagai ki maar jhelani padegi.

Vikas ki baat jab neta kare, to janata ko yah samjhane ki bhul nahin karani chahiye ki neta ji samaj ke vikash ki baat kar rahe hain ? Neta ji ka vikash se matalab , unaka apana vikash se hota hai. Jitana ve kaam karayeinge utana hi unako kamisan milega. Unaki jeb bharegi.

Sabhi rajnitik dalon ka yahi sach hai. Agar janata is sach ko nakarati hai, to ve apane pairon mein kulhadi marane ka kaam karane jisa hoga.

Abhi in sab se bachane ka koi rasta nahin hai. Yah sab galati janata ki hai. Netaon ne janata ko varg, jati, dharam ke adhar par baant dala hai, isaliye ve is phoot ka phayada uthate hain. Jab tak yah prabrati bani rahegi, kisi sudhar ko koi ummid nahin karani chahiye.

Yah janata par adharit hai ki ve kya chahate hai , tukade tukade batana ya desh hit mein kuchch karana ? Jimmedari janata ki hai. Democracy mein janata hamesha sarvopai rahi hai, aur rahegi, hamein yah kabhi nahin bhulana chahiye.

Princess Dyna ki maut se jude sawal

Maine priness dyna ke baare mein bahut kuchch padha aur manan tatha chintan karane ke baad yah tathya nikala ki, unaki maut ke pichche ek prakar ka khadayantra racha gaya, jo bahut sochi samajhi saajish, mafia girohon aur France ke badmashon ki sahayata aur british khufia agencies ke satik guana bhag aur paristhitiyon ko apane pachch mein bhuna lene ki chchamata ka  vastavik udaharan hai.

Jab kisi rastra athava aise vyakti ki pratishtha daanv par lagi ho, ijjat ki baat ho to koi bhi kuchch bhi kar gujarane ke liye kisi bhi had tak ja sakata hai. yahi sab dyna ke mamale mein hua. maine apna kayas lagaya hai aur isake alava paristhitiyon ko samajhane ki koshish ki hai. Koi kisi ko bina karan ke nahin mar dalata. Isake pichche koi na koi  karan jarur hota hai.

Khuphiya agencion ne bhade ke badamashon ki sevayein avashya li hongi. Inhe vyakti ko kaise khatma karana hai, ise ve badi khubasurati ke saath anajam de sakate hai. Inko madad dene ke liye kai jagahon par aise longon ki tainati ki gayi hogi jo ek var khali jaane ke baad doosara aur phir teesara sahi baithe, isaki puri taiyari ki gayi hogi. Bhagne ke rastey kya ho sakate hai, kahan jane ki aur kis disha mein jane ki sambhavanayein ho sakati hai, in sabako soch samajhakar puri ghera bandi karake tab satik tarike se surang ke andar jakar kaam laga dia gaya.

Maine apana aankalan kalpana ke adhar par kiya hai. Ho sakata hai yah theory galat sabit ho. Vastvikata to koi bhi nahin jaan payega. Yah dusare hi-fi murderon ki tarah hi ek raaj banakar rah jayega, jise ham kabhi bhi nahin jaan payenge. Han , yah jarur itihaas banakar rah jayega.

Sarkari Karmachariyon ki Gundagardi aur Dada Giri

Aj main jab apani naukari karake dopahar lagabhag 2.30 baje ghar vapas aaya to dekha ki mere ghar ki bijali nahin aa rahi hai. Main 5000 pancha hazar rupaye ki naukari karne ke liye subah apane ghar se 9 baje nikalata hun aur do baar paidal chalne aur do bar sarvajanik vahano ki savari karake nukari karane rojana jata hun aur 2.30 ya 3 baje dopahar ghar vapas aata hun.

Main aur meri braddha patni  ghar mein rahate hain. mere jane ke baad meri patni akeli rah jati hai. Bijali na aane ka karan jaanane ke liye main ghar ke neeche aaya to pata chala ki saare Cut-outs koi nikalkar le gaya hai. Aspaas puchchane par pata chala ki bijali wale aaye the aur mere saare cutout lekar chale gaye.

Kyon, karan janana chaha ?. Mere saare bijali ke bil jama hain December 2007 tak, phir kyon yah badamashi ki gayi. Aaj shanivar hai. Kal ravivar hai. Daftaron ki chchutti rahati hai. Cutout hatane ka kya matalab hai. ? Yah to sarasar sarkari gundagardi hui. Na poochchana , na janchana, na koi jimmedari, na suchana dena, ki ve kya kar rahe hain, Na aaspas ke kisi sajjan ko bataya ki ve kya kar rahe hain. Choro aur uthaigiron ki tarah aaye aur cut-ou lekar chale gaye. Bijali ka bill jama hai. Main sidhe meter se bijali le raha hun. Mera darwaja hamesha khula rahata hai, jahan meter laga hai.

Is tarah ki sarakari kamachariyon dwara ki ja rahi gundagardi aur dada Giri ko rokane ka kya upay hai ? Kya Ham inse milane ke liye  ya baat karane ke liye inake daftar mein, haath mein joota aur jaban par ma bahan ki gali lekar inse baat karene  jaye ? Ya phir ek avaidha asalaha lekar aur gundai ya dabangai ke balbute par inko dekha jaye ? Ya phir chupchap baithakar sara tamasha dekha jaye aur sari najayaj baton ko bardasht kiya jaye aur aise atyacharon ke khilaf bola bhi na jaye?

Jo sarakr apane karmachriyon par lagam nahin laga sakati , hamein sarkari karmachariyon se behatar aacharan ke liye koi bahut ummid nahin karani chahiye. Jab shirsh sthanon par baithe huye logon ka charitra hi dagdar , lootmar, uthagiri , lemari aur beimani  se bhare huye pulande ka bana hua hai, to inake aadhin kaam karane wale karmachari  aisa karate hain, to unaka aacharan koi sajjanata se bhara hua nahin hoga, aisa vishvash katai nahin karana  chahiye.