Is samaya desh mein Rajnitik ghatana kram bade tezi se badalatey chale ja rahe hain, media har pal mein kahan kya ho raha hai, in par drishti jamaye huye hai. Nisandeh , kab kaya ho jaye isaka koi bharosa nahin, kab kaun kahan palti mar jaye, kaha nahin ja sakata hai,

Yeh desh ki rajniti ke liye shubh lakshan builkul nahin hain. yah to narak mein dalane wali stithi hai, jis desh ka koi moral na ho, charecter na ho, imandari na ho, naitik muly na ho, vahan kaya hoga ? Kewal apane phayade ke liye , desh ke rajnitik dal yah sab kar rahe hain ya phir unake pichche ki kya mansha hai , kya koi batala sakata hai ?

Mujhe lagata hai ki apane swarth ke liye, ye neta desh ke saath kuchch bhi kar sakatey hai, ye kisi na kisi ke haath bike huye log hain, aaparadhik prakrati ke netaon ka daman thama ja raha hai , isase Congress kya sandesh desh ke logon ko dena chahati hai ? Un logon ke daman ko thama ja raha hai, jo apani gair kanooni manshaon ko pura karana chahatey hain, ye kaun sa congress ka netratva aa gaya hai ?

Neharu ji ke jamane mein aisa nahin hua, neharu ji se lekar Indira gandhi tak aisa kabhi nahin hua, is tarah ki pahal ki shuruaat Narsimha Rao ke shashan kal mein hui, aur is nazir ne Kharid Farokhta ka bazar SANSAD tak ko bana dala. Congress ka aisa vidroop chehara maine aaj tak nahin tekha. Isase achcha tha ki Manmohan singh apani naitik jimmedari nibhatey huye, gaddi chchod dete, kam se kam desh ke rajnitik aur naitik mulyon ki surkshsha to hoti ?

Ooont kis karavat badalega, yah koi nahin janata ? Koi jite ya haare, isase koi pharaka nahin padata, lekin DEMOCRACY KI aisi CHCHICHCHALEDAR  dekhakar man mein pida avashya hoti hai.

Lakshan dekhakar to yahi lagata hai ki , Mayawati, hi agali Pradhan Mantri banegi. Yah ek chauka dene wali baat huyi hai, sabhi bhauchakke hokar rah gaye hain, Mayawati bahut strong hokar ubhar aayi hain aur ab jo samikaran benenge ve mere hisaab se bahut jabardast honge.

Mayawati ka naam uchchala gaya hai, Bampanthiyon ki taraf se, isaka matalab yah hua ki Mayawati ko left ka saath mil chuka hai, Left ko pichche se support mil raha hai BJP ka, khud Mayawati ke bhi sansad unake saath hain. NDA yani Rajag ke sabhi ghatak dalon ne apani pratibadhdhata saath saath rahane ki dikhai hai, isase lagata hai ki NDA ki tut ki koi sambhavana nahin banati.

Mayawati ke sabase saath , jo jabardast gun hai, wah unaka Dalit hona, mahila hona aur ek sakhta prashashak hona hai, unake abdar nirnaya lene ki chchamta bahut jabardast hai, Panditon aur Daliton ki chemistry unake saath hai, isaliye ye baatein unake paksha mein jati hain.

Dusarti baat yah ki Yadi Mayawati Pradhan Mantri banati hain, to ve Bharat Desh ki dusari Mahila pradhan mantri hongi, kyonki Indira Gandhi ke baad se koi bhi mahila is pad par nahin baith saki hain, ek baat jo mahatwapoorna hai, vo yah ki Mayawati Pahali DALIT Pradhan Mantri Banegi, jo itihas mein yaad rakhane jaisa karya hoga, yah bahut badi baat hai, ADMK, aur dusare South India ke dal is baat par gaur karenge aur mujhe lagata hai ki ve support karenge,

Lekin, agar, MAYAWATI, Pradhan mantri nahin bhi ban pati hain, ti nishchay hi dalit rajniti ek anokhe mod par chali jayegi, aur yah tay hai, ki bade bade diggaj is andhi mein ud jayeinge.

Agar sarkar banati hai Mayawati ki, to samarthan sabhi dalon ka hoga, kuchch bahar se samarthan denge, kuchch sarkar mein rahakar denge. BJP, shiv sena  aur bam dal shayad na shamil hon, lekin chchote chchote rajnitik dal isamein shamil honge, nirdaliya bhi mantri banenge, chchut bahiye bhi minister banenge, aur yah sarkar ek saal tak ghasitate ghasitate chal jayegi, isaka phayada ye sabhi ralnitik dal uthayenge, kyonki satta prapti ka yah samikaran bahut jabardast hai.

Congress aur unako support karane wale sabhi dalon ki mitti palit hona tay hai, unaka bhavishya andhakar may hai, jo congress ke paksha mein jayenge, ve buri tarah se harenge , yah tay hai.

Miyan musharraf Pakistan desh ke President hain, jaisa ki khabare aa rahi hain unase , yahi andaza lag raha hai ki shayad wahan ke rajnitigyon ka ek gut Miyan Musarraf ko hatane par tula hua hai.

Yahan ek baat Pakistan ke rajnitigya samajh lein , Miyan Musharraf ko agar gaddi se hataya to Pakistan kisi ke sambhale nahi sambhalega. Halat itane bure ho chuke hain ki Miyan Musharraf hi use sambhal pa sakatey hain. Unhe pata hai ki kahan kya ho raha hai, wahan ki kya paristhitiyan hain,  aur isase kaise nipta ja sakata hai. Agar Miyan Musharraf hatey to Pakistan ke bahut bure hal ho jayeinge.

Behatar yahi hoga ki miyan musharraf  ko abhi gaddi par baithayein rakkhein, unhe hatayein nahin. Samajhdari isi mein hai ki Pakistan ke rajnitigya apani apani vyaktigat mahatvakanchcha ko bachaye rakkhe, jab mauka aave aur desh ki stithi dharre par aa jaye, tab Miyan Musharraf ko hatane ke liye vichar karein, isase pahale nahin. Is samay Pakistan apani aantarik samsyyon se jujha raha hai, vahan halat bahut kharab ho rahe hain, aise mein Rajnitigya pahale in samasyon se nipatey, baad mein kuchch aur sochein. Koi bhi rajnitigya Miyan Musharraf ko hatane ke liye , philhal  koi muchchon ki ladai ka prashna na banve, yahi achcha hoga.

Bahut bura haal hai , is samay desh ka. Yah sankat koi ek din mein nahin paida huaa hai. Pichchale char saal ka lekha jokha dekhein to yahi pata lagega ki is sarkar ne sivay hawa bazi ke, koi thos kaam nahin kiya. Yeh sensex dekh dekh kar uchchaltey rahe, aur is uchchal phand mein jamini haqiquat se door hote chale gaye. Udhar smasyayein badhati rahin, kisi ne dhyan nahin diya, pahl yah hua ki jo bhi parinam mile , wah  sarkar ke papon ke karan sare desh vasion ko bhugataney pad rahe hain.

Yah stithi aane wale dinon mein aur adhik badhaney wali hain, samasyayein kam to hongi nahin ,sivay badhaney ke, koi yah soche, ki smasyayein kam hongi to vah sivay dilasha dene ke aur kuchch nahin kar raha hai, ye kam ho jayeingi isaka to katai naam na lein.

Is samay sarkar ICU mein nahin chal rahi hai, balki yah CCU [Critical Care Unit]  mein hai, jisaka koi bharosa nahin ki kab kya ho jaye. Jis niyat se sarkar banayi gayi thi, vah koi desh ke bhale ke liye thi hi nahin, yah satta prapti ke liye ki ja rahi ati chchataptahat ka natija thi. Us samay ko yaad dilaye de raha hun, kis tarah se Congressi Madam Soniya ki chatukarita mein lage huye the, koi pistol nikal kar ke apane ko mare le raha tha, nautanki charam sima par ki ja rahi thi. Madam Sonia ke tyag ke kaside padhe ja rahe the. Tabhi Pradhan Mantri ji back door se aa gaye, sidhe chuna hua pradhan mantri koi nahin ban paya balki back door se aya pradhan mantri shayad yah Bharat Desh ke Itihas ka pahala udaharan hoga, jise Congression ne kar dikhaya.

Is durdasha ki jimmedari kiski hogi, Pradhan Mantri Manniya Man Mohan Singh ki , ya Congress Adhyaksha Madam Soniya Gandhi ki, ya Bam dalon ki, ya Samprag mein shamil ghatak dalon ki, kyonki is paap mein sabhi bhagi hain, lihaja barbadi ka thikara kisakey sir phoda jay, yah bhi kuchch dinon mein samaney aa jayega. Abhi sab chup hain, bali ka bakara kise banaya jay , isaki talash jaroor jari hogi.

Aaj 03 July 2008 ko Baba Barfani yani Baba Amarnath ke liye Vishwa Hindu Parishad aur inake anusangik sangathano ne BHARAT BAND ka avahan kiya tha. Jo sacche hindu hain unhone badi shraddha aur bhakti se apane apane pratisthan swechchya se band kar diye, jinhone nahin kiya , unake baare mein samaj ke longo ki pratikriya kya rahi, aaiye sunate hain

Ek:

“Jin Hinduon ne aaj ke din Baba ke liye apani dukane aur kaam nahin band kiye hain, Baba ki atma unake liye krodhit ho rahi hogi, Baba unaki khatiya jaroor khadi kar denge”

Do:

“Hindu samaj ke log itane kayar hain ki Baba ke liye ek din ki haratal bhi nahin rakh sakatey hain, Baba barfani ke liye Hindu samaj apani jaan de raha hai, ye saale kayar, itana bhi nahin kar sakatey ki ek din unake kaam ke liye, apana kaam band kar dein”

Teen:

” Jinhone Baba Barfani ka saath nahin diya, Baba ka para high ho raha hoga unake liye, Baba unase nipatenge dekh lena, sari chaturai na ghus jay to kahana”

Char:

” Baba bade dayalu hain, ve sab samajhatey hain, jinhone khola unase bhi khus , jinhone nahin khola unase bhi khus, aakhir Baba hain to Bhole Bhandari, lekin aaj ke din dukane kholkar hinduon ne achcha nahin kiya”

Yah sawal sabhi desh wasiyon ke samaney hai, ki kya ham Loksabha ke chunav ke liye taiyar ho jayein ?

Abhi mahaul to aisa nahin lagata hai, jaisa ki logon ka ankalan hai, ek do pakahware mein to kuchch bhi nahin hone wala, par jaisi rassakashi ho rahi hai aur aichatani jari hai, usase to yahi lagata hai ki kuchch na kuchch to hoga jaroor.

Mera ankalan yah hai, ki abhi july mahina aur agast mahina tak to noora kushti chalegi, dhamakane aur manane tatha ek doosare ko dhaus patti dene ka silsila jari rahega. September aur October ye do mahine Bhartiya Rajniti ke liye bahut crucial honge. In do  mahino  mein sambhavana hai, ki Congress koi aar paar ka nirnaya legi, aur parmanu karar par sidhe hi America se baat karegi, baam dal chahein jitana ho halla machayein, tab tak kaam lag chuka hoga. Sarkar yadi alpamat mein bhi aati hai to yah nirnay hoga Loksabha ke andar. Jaisa ki sabhi janatey hain ki Rajnitik dal kab kya gul khila dein, koi nahin janata. Jab tak ho halla machega tab tak aa jayega december, sarkar bache ya gire , itana samay nirvachan aayog ke paas rahega ki vah aaram se election kara sake, idhar January ke akhir tak nai sarkar banakar aa jayegi.

Is dhamachaukari ke bich mein congress ko kahane ka mauka mil jayega, ki hamane bahut koshish ki, America bhi khush aur bhartiya janata bhi khush. 

Vartaman mein desh bahut kathin paristithion se gujar raha hai. Congress ki samprag sarkar ne is desh ke nivasiyon ko aisi vikat paristithion mein lakar chchod diya hai jisase ubarana bahut mushkil lag rah hai. Yah sach hai ki lok lubhavan ghosanayein karake koi bhi party vote hathiya karake apani parti ki sarakar bana sakati hai lekin aisi sarkarein hamesh bahut kamajor jamin wali hoti hai. Yahi hal is sarkar ka hai. Jabase yah sarkar aayi hai, isake banane se lekar aaj tak ka hal aapane dekha hoga. Congress ne Samajwadi Parti ko is sarkar ke gathan ke liye bulaya hi nahin tha. Yah to Comerade Sardar Surjeet ji the, jinhone sarkar banane ke liye pahal ki aur Amar singh ko lekar saath mein gaye the, jinako kisi congressi ne ghas tak nahin dali, tamasha dekhiye , yahi Samajwadi kendra mein sarkar mein shamil rahe, aur congressi inako galiyan dete rahe, jab yah U.P.  mein sarkar chala rahe the. Amar singh ne Rahul gandhi ko khijhakarake kah bhi diya tha, ki ” abhi ve launde hain”.

Samprag sarkar ki sabase badi galati yah rahi ki inhone aate hi aate , Rajmargon ke jodane wali swarnim chaturbhuj yojana  par viram laga diya. doosari galati yah rahi ki inhone bahut si commodities ko satte bazar mein satte ke karobar ke antargat le aaye, yahan tak ki khane pine ki chijon par bhi, isase bahut si chijon ke daam asaman chchute chale gaye, sarkar kewal sensex dekhati rahi ki vah kis speed se badha raha hai, inhone yah dekhane ki jahamat hi nahi uthai ki isake kya parinam honge, ab jab sensex ki halat din pratidin kharab hoti ja rahi hai tab aage kya hal hoga , yah to bhagawan jane, lekin jis tarah se halat bigar rahe hain, hamein jyada behatari ki ummig nahin karani chahiye.

Apani nakamyabi ka thikara hamare rajnitigya doosare ke upar phodane se baz nahin aate. Yahi ab ho raha hai, aage bhi hoga, bas desh ki janata kim kratavaya vimoodha hokar yah sab dekhegi, aur janata sochegi ki ham kaise jiyein.

Mumbai ke log Batate hain ki apane desh ki swatantrata se pahale, desh ke Parasi samuday ki jan sankhya karib char lakh ke aas paas thi. Ab yah jansankhya ghatakar lagabhag 75 hazar ke aas paas aa gayi hai, Isaka karan kya hai, yah maine janane ki koshish ki, jo bhi facts samane aaye hai usase yah lagata hai ki, parasi samaj ki yah samasya unaki apani hai aur ab samay ki jaroorat hai ki ve is samasya par vichar karein.

Mera bahut se parasi parivaron se mel milap hai. Main aksar unase pochchata hun ki ve apani janasankhya badhane par dhyan kyon anhin de rahe hain. Ek baar ek parasi sajjan mere paas aaye, unake saath unaki dharam patni bhi thi aur do bachche bhi. Maine unase yah janane ki koshish ki , ki unaki jansankhya  kyon kam hoti ja rahi hai ?

Mujhe kuchch batein pata chali, pahali Parasi samuday ke ladake shadi ke anikshuk hote hain, kyon ? isaka javab yah mila, ki parasi samuday ke logon ke rahane ke style bilkul alhada tarike ke hain, yadi ve shadi kar lete hain to unake rahane ke style aur shano shaukat mein fark padega, jise ve bardashta nahin kar sakatey, is badhe huye kharch ko bachane ke liye, ve shadi nahin karate hain. Doosara, yadi ve shadi karenge to jahir si baat hai, unake kharche bhi badhenge, yah ek aur vyakti ka kharcha unake bajat se bahar ki baat hai, isiliye ve soch samajh kar shadi karatey hain aur bachche bhi kam paida karane mein ichcha rakhatey hain, mamala saaf hai ki yah aabadi ka masla Parasiyon ki arthik stithi se juda hai.

Aam taur par parasi samaj ke log, Rajniti jaisi baton se door rahatey hain. Mumbai mein Sanjan ke pas Mumbai ki Parasi samaj ki seva karane wali ek mahila Meher Master Moos ne Zorostrian Foundation sthapit  kiya hai, mujhe ek parasi sajjan bata rahe the, ki yahan par ek time capsule jamin ke andar chchoda gya hai, taki jab Parasi samaj ke log vilupta jatiyon mein ho jayein, tab unake bare mein janakari is time capsule se jaye.

Yah to samay hi batayega, ki kya hoga ? Philhal is disha mein PARASI SAMAJ ke logon ko batana chahiye ki ve apani jansankhya kaise badhayein ? Mera to yahi mashwara hai, ki Parasi samaj apni janasankhya kam se kam 4 lakh to avashya hi le aaye. Bachche paida karane ke liye Parasi Mahilaon aur Parasi Navyuvakon ko aage ana chahiye. Main Parasi samuday ko vilupta hote nahin dekhana chahata. Meri ichcha hai ki ve anant kaal tak apani pahachan is duniya mein banaye rakkhein.

Kuchch varsha pahale, meri patni kisi mandir se kuchch rakam kharcha karake, ghar mein dhan badhane hetu, Garibi door karane ke liye , kuchch samagri le aayi. Ise pooja sthal par badi shradhdha ke saath sthapit kat diya gaya. Ab roj isaki pooja karane ke liye, meri patni ne kaha.

Swabhavik hai, ghar mein rahana hai, to baat to manani hi padegi, isaliye maine kaha ki “theek hai, rojajan pooja kar doonga”. Patni ne doosara sawal khada kiya, ki , ” Rojana jitana dhan paida karate ho, vah sab isa par rakha diya karo, aur raat bhar isi par rakhakar subah jahan rakhana hai, vahan rakha dena. ” Maine aisa hi kiya, main roj kamata hun, aur roj kharcha karata hun. Karza dene ke liye badi mushkil se katarbyont kar , kisi tarah se karza chukata hun.  Ab hone yah laga , ki meri roj ki kamai , badhane ki bajay, ghatane lagi, hal yah ho gaya ki meri rojana ki amadani kai kai dinon tak shoonya ho gayi.

Ab ghabarana to lajimi tha. Maine dhyan dena shuru kiya ki abhi tak to sab thik thak chal raha tha, yah achanak kya ho gya. mere dhyan mein aaya ki meri patni jo yantra layi hai, sab isaki karamat lagati hai. Usi din se maine us yantra ke chakkar mein paise rakhane band kar diye. Dhire dhire mere kaam ki gadi patari par aane lagi. Din bitate chale gaye, maine socha, Yah SHRI YANTRA , jo meri patni layi hain aur pooja ghar mein rakkha hai, ke saath aisa sanyog ho sakata hai ki meri roaj ki kamai par kami aa gayi ho. Hazaron log , isaki pooja karate hain, kisi ne aisi shikayat nahin ki, Yah mahaj mere saath mein sanyog ho sakata hai, lihaja kuchch mahino baad  amine phi SHRI YANTRA ki pooja karani shuru kar di, mere saath me phir vahi chakkar hone laga, is baar bhi maine kuchch dinon ke baad pooja karana band kar diya. Phir gadi patari par aane lagi.

Teesari baar , phir yahi hua. Mera matha thanaka, maine vichar kiya, ki is tarah ke anusthano se bachana chahiye.

Ek pandit ji ne mujhe salah di ki main Moonge ki anguthi pahanu to mere din phir jayenge. Din to nahin phire, lekin meri ungaliyon mein, khal katane lagi aur ek khas tarah ki allergy aur twacha ki bimari hone lagi, ise bhi maine kai baar pahan kar aur utar kar isake phal ke baare mein samajhane ki koshish ki. Mera anubhav is prakar ke tantra mantra aur vishwas par kam jamata hai.

Main kuchch chijon par vishwas jaroor karata hun, jaise ki kul dewata  ya  Miya bhaiyon ke Saiyyad Baaba. Mera makan kisi jamane main musalman bhaiyon ka tha. Abhi kuchch varsh pahale, jab main bahut pareshan hal tha tab, ek miya bhai ke kahane par maine apane ek kamare mein, ek ALA banakar usame rojana SAIYYAD BABA ke naam se Deepak jalana shuru kiya. Sanyog ki baat yah hai, ki is prakriya ke karane ke baad se mere kashton mein kami aayi, jin baaton ke liye main pareshan rahata tha usamein kami aayi aur  mujhe bahut kuchch rahat mili. Main aaj bhi rojana dipak jalata hun aur ise kabhi bhulata nahin.

Isake pichche ek logic yah ho sakati hai, jo main sochata hun. Jab yah makan bana hoga , tab ise banane walon ne bahut takalif aur kast uthakar ise bahut pyar se banaya hoga, unaki bhavanayein isake saath nishchit hi judi hongi. Na jane kitani baar is makan mein Pavitra Kuran ka paath kiya gaya hoga, na jane kitane log , bade budhe, bujurga is makan me rahe honge aur is duniya se kuch kar gaye honge, unaki kya ichchayein rahi hongi. Miyan bhai the, isaliye unaki kabrein bhi , sthaniya kabristan mein hongi, unaki aatmayein kya is makan se nahin judi ho sakati hain ?

Yah sochakar, maine rojana deepak jalane ka vichar kiya, kaha bhi gaya hai, bujurgon ke naam makan mein rojana unaki yaad ke liye deepak jaroor jala dena chahiye, taki unaki aatma ko yah na lage ki unake ghar mein koi deepak jalane wala bhi nahin bacha.

Kya ho gaya hai is desh ko ? Kya is desh ki atma mar gayi hai ? Kya yah desh anathon ka ho gaya hai ? Kya yah desh sambhale nahin sambhal raha hai ? Bahut se sawal hain, jinaka uttar dhoondhana hoga, kyo aisa ho raha hai ?

Is Desh ki atma bujha chuki hai. Is desh ke logon ka khoon pani ho chuka hai. Kabhi Inqlab ka nara lagane wale , mutthi taan kar samajwad lane walon ko lakawa ki bimari lag gayi hai. Akhir kyon ? kya wajah hai ? Hamare oopar atyachar ho ta rahe aur ham chup baithe rahein, is manasik napunsakata ka jimmedar kaun hai.

Jawab bhi sida sada hai, ISAKE LIYE JIMMEDAR IS DESH KI JANATA KE ALAWA AUR DOOSARA KOI NAHIN, is desh ki janata ki tulana main SODA WATER  ki bottle se karata hun. Soda water ki bottle jab khulati hai, to badi tezi se uphan marati hai, jhag badi tezi se nikalata hai, Gas bhi badi takatwar hoti hai, is uphan ka josh tez kisma ka hota hai. I desh ke logon ka bhi yahi haal hai, janata ubalati badi tezi se hai, jaise hi gas nikali, pichak kar sab dhile ho jate hai aur vyavastha ko gali dekar apane apane  kaam mein lag jate hai.

Main yah sab Jawahar Lala Neharu ke jamane se lekar Manmohan singh ke jamane tak dekhata chala aa raha hun. Inqlab aue Kranti jaise shabda raddi ki tokari mein chale gaye hain, ab sab yahi sochate hain ki koi Bhagart singh hamare ghar na paida ho, koi chandra shekhar unake ghar na paida hon , agar paida hon to Harshad Mehata aur lambi rakam ka ghotala karane wala paida ho.

Jahan is tarah ki manasikata hogi, wahan kya hoga ? Jahan sab loot khasot machane wale hon wahan kya hoga ? Is kamjori ka phayada aj ke neta nahin uthayenge to aur kaun uthayega ?

Main to yahi kahoonga ki is desh kiatma mar chuki hai, yah murda mansikata walon ka desh ho gaya hai.