Uncategorized

Mulyon ki Rajniti se Sarkar ko koi khatara nahin

Jo yah vichar kar rahen hain ki Shri Manmohan singh ji ki sarkar gir jayegi, ve ab is bhram mein na rahein. Matalab saaf hai, aisa koi mood aur karan nahin dikhai deta hai ki  sarkar ko koi khatara hai. Parmanu deal par Left ko sarkar se hatana tha, yah to tay mana ja raha tha. Sabhi mauke ki talash mein the. Agar yahi sab kuchch ek derha saal pahale hota, tab to sarkar bachane aur girane ki kavayad jari rahati, ab jab Loksabh ke chunav sir par hain to sarkar girane aur bachane se kisi ko bhi phayada nahin hain. Ulate sabaka nukasan hai, isaliye mulyon ki rajniti karake mamala aage badhaya ja sakata hai. Jharkhand ke sansadon ka mamala yad hoga. Sibu suren aur unake sathi mulyon par adharit rajnitik muddon par ho to sarkar bacha paye the. Yahi yahan bhi hoga.

 

Vaise to sabhi partiyan mulyon par adharit rajniti karati hain, iname se kisako kya kaha jaye, mera man nahin kahata hai, yah aap sabhi log samajh lijiye, saf baat yah ki ab mudde pichche chchut gaye, manniyon ke jivan mulya aage habi ho  gaye. Kitney sansad aise hain , jinhone Parmanu deal ke bare mein jana aur samajha hai. Mere Vichar se shayad hi koi janata ho ki 123 [ek so teis] dharaon mein kya kya bandh aur upabandh tatha sharteyin lagu ki gayi hain.

Phir bhi , hamein is vishwa mein rahana hai, to is tarah ke bandh aur upbandh to jhelanein hi padenge, chahe ham chahein ya na chahein, kuchch khoyeinge to kuchch payeinge jaroor, lekin kab tak ? Philhal jo bhi milega, vah 25 saal ke baad hi, yani jo aaj kareinge usake phal ki prapti ke liye, kam se kam 25 saal intazar karein.

Phyada uthayeinge Rajnitik dal, kyongi yah bahut unche darze ki kahani hai, hamare aapke jaise sadak chchap logon ki kaun sunata hai, aam jan ko koi rahat milegi, ise bhul jaiye, aur mahangayi se bachane ke upay dhoondiye, isi mein sabaka kalyan hai.

Galti hamari hi hai, ham in jaise mulyon par adharit rajniti karane wale longon ko chunakar bhenjenge, unase hame ulat kar yahi sab milega.

Kanoon ki ud rahi dhajjiyan

Bharat desh ki kanoon vyavastha bahut lachar aur durdasha grast ho gayi hai. Hall yah hai ki Supreme court ke aadeshon ki bhi avahelnayein ki ja rahi hain, aur is shirsh adalat ke dwara pass kiye gaye orders ko manane ya lagoo karane mein bhi kisi ki koi dilchaspi nahin hai.

 

Yahi karan banata yah galat sandesh janata ke bich mein , ki chahe jo karo , koi bhi aparadh karo, koi bho chori,chchinara karo, katal kar dalo, mar dalo, kaat dalo , kuchch bhi hone wala nahin hai. Yah arajakata purna stithi  sabhi rajyon ki hai, jinhen ham dekhatey huye chale aa rahe hain. Police stations par hamala, Police station ke andar ghus kar katal kar dena, adalaton mein andar jakar mar dalana, aisa lagata hai ki log ab yah samajhane lage hain , ki kuchch bhi kar dalo koi saja hone wali nahin hai , sab chchut jayenge, bas jeb mein paisa aur dabangai chahiye, is desh mein sab kuchch kar sakatey hain.

 

Ek ktala karane wale ki baat batata hun. Usane mujhase kaha ki mujhe jisako marana tha, maine pahale paisa ikattha kiya, jise maine teen charano mein banta, 1- Farari ke liye 2- Katal karane mein sahayog ke liye 3- Thana police ke liye4- adalat ka mukadama ladane ke liye. Usane bataya ki jaise hi paise ka intazam hua, maine apane sathiyon ke saath jakar apane dushman ka gala kaat dala aur useke kai tukade kar diye, phir ham pharar ho gaye, mauka pakar adalat mein setting sahi karake hazir  ho gaya. Gavahi sakhi mili nahin , main chchut gaya, ab muchchon par tav diye sabako lalkarata rahata hun.

maine poochcha police kuchch nahin karati, usane kaha sab bikau hain, adalat ke judge bhi, paisa phenko tamasha dekho. Bola “Pandit ji, jisako chaho usako khule aam aslahe se uda do, 302 kar do, kuchch bhi nahin hone wala, bas paisa hona chahiye, yahan sab bikau hain, jisako chaho kharid lo”

 

Sahi bhi hai, kanoon unake liye hai, jo kanoon se daratey hain, jaisa ki main hun. Main 14 varsha ka tha, jab pahali baar adalat mere pita ji mujhe le gaye the, unaki tabiyat kharab rahati thi, isaliye mujhe saath mein jab tarikh hoti thi, le jaatey the, taki main daudkar vakil,kagaj patra aur unaki seva kar sakoon, aur mere pita ji ko jyada mehanat na karani pade, mere pita ji hridaya rogi the, aur jyada kaam nahin kar paatey the. Tab se main aaj tak Mukadamey lad raha hun, ab main budha ho chala hun, jyada mehanat nahin hoti, isaliye ek pairokar rakh liya hai, ya to vah tarikh par jata hai,  ya mera beta jata hai, mujhe bhi kabhi jana pad jata hai. Munsif adalat se lekar high court tak main mamale lad chuka haun, ab bhi high court  main mamale pade huye hain, jinaka 25 saal se abhi tak nistaran nahin ho paya hai, yah hamare desh ki kanoon ki dasha hai.

 

Kanoon itana kamajor hai ki kai kai saal ho jate hain, jisake upar mukadama dayar kiya jata hai vah hazir hi nahin hota, kai kai baar samman bhijawane, registry se samman bhjane, ke baad bhi log likhava dete hain ki mile nahin, post man paisa khakar likha dete hain, “ki ghar jane par pata chala ki ve nahin hai, atah vapas” Court dwara bheje gaye samman ka yah hal hai, jab kisi samachar patra mein gazat karatey hai, tab jakar haziri hoti hai. Court ki karyawahi itani dhimein hai, ki varshon bit jatey hain, faisala nahin hota, vakil ek adachan ke baad doosari adachan laga dete hain. Mere ek mamale mein 5 saal se commissioner ki report aani thi , vah bhi nahin lagi.

 

Courts ke kaam karane ka tarika bhi is desh mein jarayam badhane, aparadh badhane, kanooni pechidagiyan paida karane, arjhatta lagane, bhindi maarne aur arajakata failane wala bhi sabit ho jata hai. Yahan hal yah hai ki aap kisi bhi adalat ke galat ya sahi faisale ko bhi alochana ke dayare mein nahin la sakatey hain.

 

Deri se mila nyay, kabhi bhi nyay sangat to ho hi nahin sakata. Baharhal hanoon ki dhajjiyan log uda rahe hain aur isi karan kanon ka uphas ho raha hai aur courts ki garimayein gir rahi hain.

Senesex ke ludhakatey kadam

Vahi hua jisakanadesha tha, sabhi shanka kar rahe they ki sensex kis din dhadam hoga aur kam hona shuru hoga. Yah sab sattey bajon ka kam hai, pahale yahi kaam juari log kiya karatey they ab sab sattey baj karane lage hain, sarkar inako protsahan de rahi hai.

 

Pichchle saal  tak gharon mein istemal ki jane wali inverter vali battery ki kimat lagabhag 3200 rupaye ki thi, aaj isaki kimat 6500 ki hai, kyon , isaliye ki sarkar ne sattey baji ki list mein LEAD naam ki dhatu ko sattey ke liye de diya.

 

Abhi khane wala aaloo bhi sattey ke liye sarkar ne ijajat de di thi, yah to ganimat rahi ki badhatey huye damon ke karan sarkar ne aaloo ko sattey se bahar kar diya, varana aaloo 40 rupaye kilo aaj bik raha hota.

 

Sarkarey jab vikas ke naam par stta khelayeingi to yahi hoga, unaka kya jata hai, marenge sattey baji mein lipt log. Main saikadon logon ko janata hun , jinhone satte baji mein apana bahut kuchch gavan diya hai, aise log sadak par aa gaye hain.

 

Maine aaj tak kisi ko bhi nahin dekha ki vo sattey baji ki badaulat karod pati ban gaya ho. Mujhe to sabhi sadak chchap mile, jinhone bahut kuchch gavaya hai aur kamaya kuchch bhi nahin.

 

Mujhe to lagata hai ki yah sensex lagabhag 7000 ya 8000 ke aaspas akar thahar jayega, kyonki aap yad karein , jab panch varsh pahale sarkar thi us samay sensex lagabhag 6500 ke aas paas tha. Ab isamein thodi badhotari hokar anuman hai ki yah 7 ya 8 hazar ke bich mein aakar thahar jayega.

 

Sensex ka ludhakana tay hai, kyonki rajnitik paristithiyon ke karan yah bahut jaldi girata uthata hai.

Bhartiya Janata Party ki maujuda rananiti

BJP ne samay ki nabja pahachan kar apane 06 condidates ka khulasa karake, aur Kanpur shahar mein LKAdvani ki rally karake  ek tir se kai shikar kar diye hain.

 

Pahala yah ki desh ki janata ke samaney  is baat ka sandesh chala gaya hai, ki ab aam chunav samay se pahale hone ki sambhavana ho gayi hai, isaliye desh ki janata ab kamar kas kar is baat ki taiyari kar le , aur is chunava ke liye desh ki janata apane ko manasik taur par taiyar kar le. Desh ki janata ko is chunav mein kisako jitana hai, yah tay kar le.

 

Dusara yah , ki UPA sarkar ke ghatak dal ab apana apana existence bachane ke liye kya karenge aur unako kya ranniti banani aur samajhani hai, ve yah tay kara len, kyonki in sahayogi dalon ne kaphi din tak mauj manai hai aur malai kaati hai. Ve kya mudda lekar election ke liye janata ke samane ayeinge.

 

Teesara yah ki BJP ka khulakar aane ka matalab yah hai ki Congress ko kya karana aur samajhana hai, unake sahayogi dal chunav chahatey hai ya nahin, is baat ka dababv bhi badhana hai. Kyonki ander khane koi nahin chahata ki chunav samay se pahale hon, lekin is tarah ka dabav banane se kuchch na kuchch khalbali sahayogi dalon mein jaroor machegi, jisase manasik taur par sakriyata badhane ki ummid hai.

 

Chauthey yah ki BJP is samay tehuna dhar kar jis prakar ki hunkar bhar rahi hai aur mauke ka phyada uthana chahati hai, agar yah sandesh UPA ke ghatak dalon tak pahunch raha hai to shayad yah chunav kuchch samay ke liye tal jayein, is tarah ka dabav BJP ki taraf se aparochch roop se UPA ke ghatak dalon ko pahuchane ka hai.

 

Panchavein, Election to tay hai, yah abhi hon ya kuchch mah baad, BJP ke liye yah rehersal ka kaam hoga. Karyakarta bhi sakriya honge, anusangik sangthan jo kaphi dinon se bina kaam baithe the, unako kuchch mahinon ke liye sakriya hone ka mauka mil gaya hai.

Parmanu karar par ho rahi noorakushti

Pichchale kai mahino se parmanu karar par aaye din Congress aur bampanthion ke bich mein bade joron se noora kushti ho rahi hai, andarkhane kuchch na kuchch hai jaroor, shak to yahi hota hai. Hai koi na koi baat , jise is desh ki janata se chchipaya ja raha hai, isi vajah se bam panthi adanga daale huye hain.

 

Pahala karan to samajh mein aata hai, ki bampanthi isaliye parmanu niti ka samarthan nahin kar rahe hain , kyonki yah samajhauta America se kiya ja raha hai, yahan yah baat samajh mein nahin aati ki China ne kah diya hai ki is samajhautey se use koi pharak nahin padane wala, china ka yah kahana bhi sandigdha lagata hai, chunki china khullam khulla is samajhautey ka swagat karane se raha, isaliye vah chup hai, unake bhartiya gurge Bampanthi vahi sab kaam kiye de rahe hain , jo china chahata hai,

Doosari Baat Bampanthi ad gaye to ad gaye, samajhauta nahin hona hai to nahin hona hai, itane din baad agar bampanthi koi muravvat is samajhaute ke liye karate hain to kirkiri bampanthion ki hogi, aba yah mamala lagata hai “Prestige issue” ka ban chuka hai. Yahan sawal kredibility ka bhi hai.

 

Teesara UPA ke sabhi ghatak dal bhi nahin chhatey ki yah samajhauta ho, unhe dar hai ki agar samajhauta hua to sara shrey Congress ko milega aur unako sivay lollypop ke kya milega, malai chchanenge Congressi aur kham thonk kar Congressi kahenge ki yah sab hamara kiya hai, UPA ke gahtak dal sivay baal ukhadane ke aur kya karenge.

 

Vaise bhi is karar ka virodh ho raha hai, agar yah isaliye kiya ja raha hai ki isase bijali utpadan badhega to Bharat sarkar ko yah samajhana chahiye ki unake yahan is tarah ki technology maujud hai, ve kyon isake liye itana jor aajmaish kar rahe hain ? Mujhe daal mein kaala najar aa raha hai . Koi na koi baat is desh ke longo se chchupai ja rahi hai. Abhi koi spast baat samane nahin aayi hai. Na hi kisi baat ka khulasa kiya gaya hai. Shak sarkar ki niyat par hai.

 

Main Bampanthion ke is ‘stand’ ka samarthan karata hun. 

Dainik Jagaran: Aaadi sampadak Swargiya Poorna Chandra ji Gupta se judi yadein

 

 

“ Chacha ji “ ki dharamapatni , jinhe main “Chachi ji”, kahata tha, bahut dharmik aur karmakaandon mein vishvash rakhane wali mahila thi. Unhe main rojana ek nishchit samay mein , pas ke madir , MATA TEPESHWARI  DEVI  ke mandir mein jate huye dekha karata tha. Ve  Ishwar  mein bahut vishwas rakhane wali mahila thi aur navaratron mein ve vishesh pooja archana karati rahati thi.

 

Chachi ji, bahut sunder aur Chacha se roop rang mein bees thi. Chacha kuchch gehuye rang ke the, aur chachi bahut gori aur sundar nak naksha wali thi. Ve bahut dhimein bolati thi aur hamesha jab ghar se bahar nikalati thi, to ve apana sir odhani ya dhoti se dhaka liya karati thi. Ve kabhi akele mandir nahin jati thi, koi na koi unake saath jaroor jata tha. Ve ek haath mein bahut shraddha ke saath  thali mein pooja ka saman  rakahati thi aur use ek safed  crosiya se bine hue  cover se  dhak deti thi.

 

Unake sath mein,  aksar Yogendra Mohan {agar main sahi naam nahin bhul raha hun to , yani sabase chchote Bhaiya, jo meri umra ke hain} MATA TAPESHWARI MADIR jaya karate the. Ek din unake saath koi Mandir jane wala nahin tha, chachi ji ka mandir jane ka samay kuchch adhik ho gaya tha, tabhi main pahunch gaya. Main rojana Chachi ji ko mandir jate huye dekhata tha, lekin kabhi unake saath jane ka mauka nahi mila tha.

 

Jaise hi main pahuncha, chabutare par baitha hi tha, samanewale chabutare par chacha ji kuchch kar rahe the, mujhe dekha, fauran  khabar bheji, Chachi niche aayin, Chacha bole “  Isako saath lekar jayein ”. Main bada khush hua, maine chachi ke haath se Pooja ki  thali pakadi aur unake saath  pichche pichche chalate huye Mata ke mandir  gaya, Chachi ji bade bhakti bhav aur manoyog se pooja karati rahi. Aisa kai baar hua. Kabhi kabhi main aur surendra mohan dono hi chachi ji ke saath saath jate.

 

Bade bhaiya Narendra Mohan mujhase bahut bade the. Ve safed kamij aur safed paint pahanate the. Adhikansh samay maine unako isi dress mein dekha hai. Ve college se cycle par vapas aate samay mujhe mila karate the. Maine unako  chacha ji se baat karate huye bahut kam dekha. Ve ghar aate, phir sidhe kahin chale jaate Main unase bahut darata tha aur unase kabhi bhi baat karane ki himmat nahin ki. Han, kabhi kabhi main unase  kuchch poochcha liya karata tha. Jisaka uttar ve sahaj bhav se diya karate the.

 

Beech wale bhiya , Mahendra Mohan, ke bare mein mujhe jyada kuchch yad nahin hai, smaran mein koi khas baat nahin dhyan mein aa rahi hai.

 

Chchote wale bhaiya meri umara ke  hain. Agar main nahin bhul raha hun, to unako Yogendra Mohan ke naam se pukarate hain. Un dino MCC Cricket teem Kanpur ayi huyi thi jisake kaptan Alegzender tha aur Green Park ke maidan mein match khela ja raha tha. Sham ke samay aaspaas ke ham-umra ke ladake ikaththa ho jaate aur Cricket ki baate kiya karate, jahir hai main bahut kam bolata tha, Yogendra mohan ko kuchch jyada hi gyan tha isaliye vahi sabase jyada batalate rahate the.   Yogendra aur unake doosare sathi , jo bagal ke makan Ram Kuti mein rahate the tatha birhana road ke doosare ham-umra ke saath rojana sham ko ikaththa ho jate the aur Nomani Bhawan ke  samane ki sadak par cricket khela karate the. Main baitha huaa inako dekha karata tha. Ek din kuchch ladake kam aaye, Yogendra ne mujhase kaha ki aap bhi saath mein kheliye, aur main fielding karane laga. Isake baad hamari dosti ho gayi, aur ham cricket khelane ke liye phoolbagh ya company bagh jane lage. Ham log cricket ki baate karate aur vahi aas pas ghumate rahate.

 

Jab meri bahan  aur unake saath jane wali saheliyon ki classess khatam ho jati tab main apane ghar vapas aata.

Gurjaron ka Utpat

Rajsthan mein in dino vahan ke gurjar samaj ke logon nein utpat machana shuru kar diya hai. Yah utpat ab to gunadai, gundagardi aur lootmar tatha jangal ke kanoon mein tabdil hota ja raha hai.

 

Ise Vasundhara sarkar ko bahut kadai se, bahut balpoorvak, bahut bedardi se roka jana chahiye. Rajya ke kisi bhi nagarik ko is tarah ke acharan karane ki ijajat kisi kimat par nahin di ja sakati. Andolan chalane wale netaon ko samajhana chahiye ki ve ek democratic sarkar ke dayare mein rahakar apani baat kah sakatey hain, jis tarah ke utpaat karane ki khule aam is andolan ko chalane wale netagan shah de rahe hain , ise katai bardasht nahin karana chahiye, yah sarasar khuleaam lokatantra ka majak hai.

 

Aaapako yaad hoga, jab chandigarh ko punjab mein milane ki baat par , punjab ke ek neta ne 30 din ke anashan ke baad dam tor diya tha, us samay Indira Gandhi desh ki pradhan mantri thin, unhone is anashan kar rahe neta ki koi baat nahin mani thi. Aapako aur yad dila dein, jab Telangana ka andolan chal raha tha, tab bhi Indira Gandhi ne badi berahami se is andolan ko kkuchal diya tha, aapako aur yad dila doon ki Gujarat mein Indira ji ke samay mein chchatron nein andolan kiya tha, use bhi bahut berahami se Indira Gandhi ne kuchal diya tha.

 

Is tarah ke besirpair wale andolano ko sakhati ke saath nipatana chahiye, isame koi burai nahin hai. Loktantra mein samvad ke dwara hi mamle hal kiye ja sakate hain, ek sima tak andolano ko chalaya ja sakata hai, jaisa ki Bharatiya Kisan Union ke neta Tokait chala rahe hain, ise main ek vyavasthit seema mein rah kar andolan chalane ka aadarsh roop samjhata hoon, is tarah ke andolano ko ek sima tak sweekar kiya ja sakata hai, lekin jaisa ki Rajsthan mein ho raha hai, yah sararsar gundai aur arajakata ke alwa kuchch bhi nahin hain.

 

Mujhe is andolan mein marahe walon se sahanubhuti hai, lekin Gurjaron ko bhi yah sanajhana chahiye ki ve jis maang ko lekar chal rahe hain usakeparinaam kya honge, unhe apana bhala dekhane ke saath saath doosare logon ka bhi bhala dekhana hoga. Aaarakshan Rajya ka vishaya nahin hai, yah Kendra sarkar ke adhin vichar karane wala masala hai, ise Kendra hi suljhayega,

 

Mujhe lagata hai, Vasundhara sarakar se is andolan ko chalane walon ko koi vishesh tarike ki ALLERGY hai, yah kisi bhi tarike ki ho sakati hai, yahi karan hai ki is andolan ko chalane wale Chief Minister se baat nahin karana chahatey hain. Doosare yah ki andolan chalane walon ko shayad democracy ke adab kayade pata nahin hain, teesare unako Rajnitik aur kutnitik danv-pench ki samajh nahin hai, chauthe agar ve is tarah se andolan karenge aur yah chalata raha, to isake khilaf bhi ve log uth khade honge, jo arakshan ka virodh karate hain, paanchavein Rajneta chahatey hain ki gujjaron ka vote bank kaise is stithi mein apani taraf hamadardi karake khinch liya jaye, aur yah kis tarah ka chara dalkar kiya ja sakata hai,

 

Yah sochane ka kaam Gujjaron ke netaon ka hai , ki ve kis disha mein jana chahatey hai, takarav se unhe kuchcch bhi hasil nahin hoga, is tarah ke andolan ki bagdor kisi samajhdar neta ke haath mein ho to achcha hai.

Bangala Desh ki simaon se ghuspaith Roki jaye

Kuchch saal pahale jab Rajiv Gandhi Prime minister the, us samay bahut badi sankhya mein Bangala Deshi nagarik Asam mein aakar bas chuke the. Asam ki Gan parishad ne jab is mamale ko uthaya, to ise rajnitik rang de diya gaya tha, aur asam gan parishad aur usake neta Phukan ki dilli varata ki asafalata ke baad, jo ghatana kram hua , use sabhi janate hain, itana sab baval hote huye bhi , Kendra sarakar nahin cheti, aur ghus paith bangala desh se barabar hoti rahi. Yaha aabadi ka  ratio itana  bigar gaya ki , yahan ke mool nivasi kahin kahin kisi kisi jile mein, alpmat mein ho gaye. Sarkar ka suchana tantra itana kamjor nahin hai, ki use in sab abton ka gyan naho, in netaon ko chahe ve delli mein baithe hon ya kisi pradesh ki rajdhani mein, inhe sab pata hota hai ki kahan kya ho raha hai, hamare jaise mukhabir , patrakar, dalal , muhalage karya karata adi adi bhare pade hain, jo neta ji ko sab tarah ki suchanayein upalabdha karate hain, aam jan yah samajhane ki bahut  badi bhul karate hain ki , desh ke netaon ko in ghatanaon ke baare mein janakari nahin hai, sab janakari hai, lekin ve swikar karana nahin chahatey hain, isaliye ki unaki netagiri kaise chalegi, vote bank kaise banega, sara khel hi yahi hai.

 

Kuchch varshon pahale maine ek European philosopher ki kitab padhi thi, jisaka shirshak tha, “Le Prince”, hindi mein “Shri Raja” kah sakate hain. Is kitab ke bare mein phir kabhi likhoonga.

 

Yahan mein baat kar raha hoon, Bangala deshion ki ghuspaith ke baare mein, ab samay aa gaya hai, ki seema ke jin jin sthano mein sugamata ke saath aur asani ke saath katile taron ki bar lagayi ja sakati hai, vahan to bar laga di jay jahan nahin lagayi ja sakati hai , vahan watch tower banakar chaukasi badhayi jay. Mujhe kuchch logon ne bataya ki Bangla deshi kis prakar se wahan tainat Border Police ko ghus dekar Bharata desh mein pravesh kar jate hain, ho sakata hai , ve kuchch badha chadha kar bol rahe hon, lekin jaroori yah hai ki is tarah ki avaidh aamad ko kaise rok sakate hain.

 

Agar yahi silsila chalu raha, to ane wali generation kahatare mole lene ke liye taiyar rahe, yah desh ki suraksha aur akhandata se juda hua pahalu hai, jise nazar andaz karana bahut mushkilon bhara hoga.

Karnataka ke chunav

Bahut se log kayas laga rahe hain ki , karnataka mein chunav ke baad kya stithi banegi, koi nahin janata ki kya hoga, lekin mil rahi khabaron aur chchanakar aa rahi reporton se to yahi lagata hai ki , Bharatiya Janata Party vahan bahumat ke karib aa jayegi, use poorna bahumat milane ki kagar par samjha ja sakata hai.

 

Yah badalav ka samay hai, kuchch bhi ho Devegauda ki party ko sabase bada jhataka lagega, congress ki halat vahan bahut patali hai, kyonki jinake jan samarthan par yah sarkar ban sakati hai, vah jan samarthan usase door chala gaya hai, rahi sahi sahanubhuti bhi congress ki mahagayi ne tor kar rakh di hai.

 

Bhale hi kitane dave kiye jay, chahe jitane example pole collect kar liye jay, isase kuchch bhi nahin hone wala, BJP  aur Devegauda ki takkar mein dekhiye kya hota hai.

Uljalul aur be-matalab e-mails

Mujhe bahut si e-mails, jinhe main, unwanted emails kahata hun, mere email box mein aa jaati hain, kuchch to videshi bhasa mein hoti hain, jaise ki german ya french ya russian  ya koi doosari bhasa jinake alphabets angreji ke alphabets se milate ho, un bhasaon ki emails aa jati hai. Ab yah to tay hai ki jab bhasa nahin aayegi to main samjhoonga kya, lekin email wale de dedanadan  email bhejate rahate hain.

 

Kuchch emails aise hote hain , jinamein chchoti umar ki kanyayein mujhase akele mein milana chahati hain, kisaliye yah to main nahin janata, lekin 18 se 22 saal kiladkiyon ki email milane ke liye aati rahati hain.

 

Kuchch emails chitra ke saath mein aati hain, jinamein ling badhane aur unake size mein badhotary ke liye kinhi dawaiyon ka varnan hota hai.

 

Kuchch emails karondo rupaye ke inam ki baat ke aate hain, ki aapaki lottery khul gayi , ya aapake naam email ka inam khul gaya hai, aur fauran contact kariye.

 

Main is tarah ki aur is jaisi tamam emails ko bina padhe huye delete kar deta hun kyonki yah sivay bakawas ke aur kuchch nahin hai. Ye fraudial vyaktitva aur vikrat manasikata vale longo ki karastani hai. Aise lubhavane emails se sabako bachana chahiye, aur kabhi bhi jhanse mein nahin ana chahiye.