Pandrah Agaust 2008 ka Pradhan Mantri ka sambodhan

Ise kya kaha jay ki Rajya sabha ke madhyam se chunakar bane pradhan mantri , sare desh ko bata rahe the, ki unaki kya upalabdhiyan rahin. Jo vyakti jindagi bhar shirsh star ki naukariyon mein raha, jisane garibi tak ko nahin dekha, abhavon tak ko nahin dekha,jamini haqiqat se kabhi do char nahin hua, jisane kabhi sarvajanik vahan se chalane ki jahamat nahin uthyi ho, jisane kabhi garibon , dehaton, ya un jagahon par jane ki jahamat na uthayi ho , jahan log kis awastha mein rah rahe hon, vah vyakti bharat jaise vishal desh ko sikh de, ki unako kya karana hai, sivay ek bade majak ke aur kuchch nahin lagata ?

 

Pradhan mantri ji ne Kashmir ka jikra kiya hai, pahale to unako khud hi yah samajhana chahiye ki , mujuda stithi ke liye jimmedar kaun hai ? Samasya khud congress ne pida ki, isaliye ki unako apana Vote bank banana hai, unaka janadhar kahin nakhisak jaye, is baat ka pura pura khyl rakkha gaya, PDP ke saath Congress ne sarakar chalayi, sara maujuda ghatana kram dekha jaye, to khud congress ki sarkar ki galati par galati hoti chali gayi, ab jab sar se pani uopar chala gaya to Pradhan mantri ji kah rahe hain, ki sare rajnitik dalon ko is samasya ka samadhan dhoondana chahiye ? Kyon ? Galati karein aap, vote bank banayein aap, malai chchane aap, jab baval sar par aaya to guhar laga rahe hain ki Madad karo.

Isase adhik dayaniy stithi bina janata ke direct chune huye Pradahan manhtri ki kabhi bhi nahin dekhi gayi .

 

Doosara Bhrasta char ka mudda, yah sabhi janatey hain ki atomic deal par hone vali Loksabha mein bahumat ke liye, kya kya nahin kiya gaya ? Ye kya bhrastachar mitayeinge, ye khud hi bhrastachar ke daldal mein phase huye hain, is bhasan se sirf aur sirf yahi jhalakata hai, ki ye neta Desh ke logon ko bevakoof aur ullooo samajhatey hai, yah kahakar ve kya sandesh dena chahtey hain, ye to vahi jane, lekin ek baat tay hai ki is desh se bhrastachar kabhi bhi nahin khatam hoga, balki aur badhega, kyonki sarkar khud hi nahin chahati ki bhrastachar khatam ho, deshvasi nahin chahatey ki bhrastachar khatam ho, mujhe nahin lagata ki bhrastachar hazaron hazar saal tak is desh se khatam ho payega ? Isaki shuruaat hi congression ne ki hai aur ab yah bimari kabhi bhi khatam nahin hogi, yah lailaj ho chuki bimari hai. Jo neta yah kahe ki bhrastachar khatam hona hai, usaka ulta sabako samajhana chahiye.

 

Teesara mahagayi ka mudda uthaya gaya, kaha gaya ki ham na hote to mahagayi kai guna badha jati. Manniya Pradhan mantri ji ko shyad bazar bhav nahin maloom hain, maloom ho bhi kaise, ve khud to kuchch kharidane jate nahin hai, unako kya pata ki aata, bhata, chawal, namak ka kya bhav hai, khane ka tel kahan ja raha hai, unako tel se kya lena dena, us janata se poochchiye, jo tel khana bhi bhul gayi hai, sabziyan khana bhi bhul gayi hai, ye kya mahagayi rokenge, kisi ke baap bhi mahagayi nahin rok payeinge, jahan netaon ki yah soch ho ki amir ko aur amir banana hai vahan yah sab batein sivay chachalava ke aur kuchch nahin lagati.

 

Kul milakar Pradhan mantri ji ka bhasan koi bahut appreciate karane wala nahin raha hai, sivay shikawa shikayat ke, kyon ki unake paad na to koi upalabdhi rahi hai na desh ko antarrashtriya biradari mein uchit sthan dene wala.

 

Mujhe to Pradhan mantri ka bhasan sunakar nirasha hi haath lagi hai, unake khatey mein appreciate karane layak kuchch bhi nahin hai. Yah sivay shabdon ki kalabazi ke aur kuchch nahin.

Jammu , Kashmir ki samasya

Hamare netaon nein is samasya ko itana ulajha diya hai, ki kisi ko koi rasta nahin sujha raha hai ki kya kiya jaye ?  Yah hamare netratwa ki sabase badi kamajori hai ki ve sahi vakhata par sahi nirnaya nahin lete, natija ham sabhi aaye din dekha karate hain.

 

Mujhe nahin lagata ki Jammu aur Kashmir ki samasya bahut jald sulejhegi, yah mamala itana pechida ho chuka hai ki jab tak dono paksha apani apani taraf se narmi nahin dikhayeinge aur akad dhauns ke bal par rajniti karenge, tab tak kuchch bhi nahin sulajhane wala, ek hi rasta hai, ki dono pakshsha apani apani taraf se narami ka rukh apanayein,

 

Amarnath shrine ke pichche darasal algav vadi takateyin kam kar rahi hain, Mufti to in alagvavdiyon ke mohare hain, ye agar alagav vadiyon ki baat na manein to atankvadi inhein hi khatma kar dein, isaliye ye vahi bhasa bolatey hain jo algavvadi aur atankvadi chahatey hain, jitana bhi ghatana kram kashmir mein ho raha hai, usaka rukh hi alga ho chuka hai, yahan Amarnath shrine ki jamin to pichche chchut gayi, mujaffrabad ke liye kooch aage aa gaya hai,

 

Election aane wale hain, yah sab hoga aur kamjor sarkarein ise rok nahin payeingi, phir bhi “Dauda Daura kar thaka dene wali policy” behatar vikalapa hai, jisase hokar shayad koi ratsta nikaley. 

 

Abhi to balprayog hi sarvshrestha tarika hai , military aur police ki karvahi is samay uchit lagati hai, balprayog karake andolan kariyon ko thaka dene ki policy par amal karein, kitane din tak ye sab baval karatey rahenge, ek din thak kar yah sab sochaney par majboor ho jayeinge ki unhe kaun sa rasta chunana hai, tab tak to yahi niti barkarar banaye rakhana chahiye.

Kuchch sujhav , jo shayad ATANKWAD se nipataney mein kaam aa jayein

Atankwad ko jis tarah se halke mein liya ja raha tha, vah ab bahut vibhatsa roop leta ja raha hai, rajneta ab bhi apani nakami ka thikara ek doosare par phenk rahe hain, lekin mool samasya ki or kisi ka bhi dhyan nahin hain, is samasya se kaise nipata jaye, atankwad ko kaise khatam kiya jaye , yah sab sochane ka kisi ke paas samay hi nahin hai, sarakar  to haath par haath dhare baithi yah  intjar kar rahi hai, ki ab agale serial blast kahan par aur kaun se shahar mein honge.

 

Nishchay hi yah lakawa grast stithi hai. Behatar hai ki, alochanaon tatha pratyalochanaon se bacha jaye, tatha gambhirata poorvak is bhayank samasya ka samadhan dhunda jaye.

 

1- Ek Federal Janch agency ko banaya jaye jo kendriya star par karya kare, abhi tak sabase badi kamajori yah samane aayi hai ki , atankwadi ek rajya mein dhamaka karake doosare rajya mein bhag jate hain, jisase unako koi pakad nahin pata, tamam tarah ki kanuni pechadigyan paida ho jati hain, aur isi la l;abh uthakar atankawadi sarsabj ho rahe hain.

 

2- Sabhi rajyon ke DGP ka ek alag se Antitererist group banaya jaye, jo ek doosare rajyon ko turat furat suchana de sakein, abhi tak yah kaam graih mantralay ke paas hai, is mantralay ko yah bahana mil jata hai, ki unhone to pahale hi suchana de di thi

 

3- Ek central antitererist organisation of states banaya jaye, jo quick information ka share aur exchange , jo bhi upalabdha ho, vah ek doosare ko bata sakein

 

4- Antitererist Court ki sankhya badhai jaye aur aise mamale jyada din tak adalaton mein na pade rahein, jyada dinon tak mamale pade rahane se tereriston ka husala aur badhata hai

 

5- Rajnetaon dwara ghadiyali anshu bahana band kiya jaye, tustikaran ki niti par lagam lagai jaye, jo kanun sammat ho wahi kiya jaye, is tarah se naram rahenge to Atankwad kabhi samapt nahin karvp payenge, isliye ichchashakti ki bahut jarurat hai

 

6- Print media ya Electronic media ke paas jo bhi khabar hon, ve pahale prasarit karein, abhi tak hota yah hai ki media kahata hai ki usane to khabar di thi , leki sarakar na kare to ham kya karein, yah bevkuph banane ke liye kaphi hai, isaliye meidia agar kahabar kare to use gambhirata se lena chahioye

 

7- Internet par ek portal banaya jaye, desh ke nagarikon se anurodh kiya jaye ki ve kisi bhi atankwadi ya atankwad se sambandhit koi suchana rakhatey hain to is portal par darz kara dein. Portal par darz suchanon ka analysis aur varification , antitererist cell apane jawano ke jariye kara le, ki sahi hain ya galat

 

8- Ho sakata hai, aise bahut se nagarik hon, jo direct police ko khuphiya suchana dene se darate hon , bhay khatey hon, ya  suchana dene se parahez karein, unake liye koi aisa pata ya address ho , jo ve ek post card, ya patra dwara atankwadion ya atankwadion ke thikano ya atankwadion ki madad karane walon ke baare mein suchana is cell ko dena chahatey hon, aisi koi vyavastha sarkar ya kisi bhi police cell dwara karani chahiye, har prapta information ka vishleshan bhi karein,

 

9- Bahut se jagaruk nagarik turant suchana dena chahatey hain, magar dar ke mare dena pasand nahin karatey, ve sanshay wale logon ko dekhatey hain, lekin suchana dene se daratey hain , unake liye koi coded number pracharit kiya jaye, jisase ve suchana darza kara sakein

 

10-  Rajyon ke har thana Police mein Antiterrerism Cell ki sthapana ki jaye , jisamein ek daroga, do constable ki alag se niyukti ki jaye, jo ilake ke andar tereristic gatividhiyon par kewal nazar rakkhein, apane mukhabiron ka jal banayein, is cell ke pas is kaam ke alawa aur koi doosara kaam na saupa jaye

 

Aise tamam upay Nagarikon ki taraf se bhi hone chahiye, Atankwad ki samasya jamin se judi samasya hai, is samasya ka hal bhi isi star se hona chahiye, tabhi kamyabi milegi.

Is tarah se barati ja rahi narami se to, koi bhi ATANKWAD se nahin nipat payega

Jis tarah se danadan atankwadi hamale aur ghatanayein ho rahi hain, aur in hamalon ke pratikriya swaroop, kendra sarkar ka dhulmul aur naram ravaiya dikhai de raha  hai, usase to lagata hai ki Atankwad se nipatane mein hum bilkul nakara sabit ho chuke hain, aur isase yahi sandesh jata hai ki ab Kendriya sattta aur   Kendra Sarakar ne Atankwad ke samane atma samarpan kar diya hai.

 

Desh ke nagarikon ko phir  wahi ghisa pita bayan sunane ko molega, jo ve varshon se ais ghatanaon ke ho jane ke baad sunayi dete hain. Marane wale kya karein, unaki sunata kaun hai, mar khap kar chale gaye  marane wale, muaavaja prapta karane ke lalach ke chakkar mein  sab bhul jayeinge, aur mamala tay tay phish, janata kare to kya kare, ye wahi janata hai, jinake bal par neta chunav mein jit kar khud ko surkshshit kar lete hain, aur marane ke liye janata ko chchod dete hain,

 

Jis tarah ki naram policy Atankwad ke liye barati ja rahi hai, isase to kaam chalane wala nahin, jab tak America jaise kade kanoon nahi lagoo kiye jayeinge, kuchch nahin hoga, civil adalaton mein to jane kitane saal lag jate hain mukadamon ka niptara karate karate, isase behatar hai , ki America ki tarz par Jehadi hamalon ke doshion ke oopar Military adalaton mein mukadama chalaya jaye, unake oopar ye hamale Rastra par hamale ki tarah se sangyan mein liya jaye,

 

Lekin yah karega kaun ? Jab sarkar mein baithe log Voton ki, Vote bank banane ki, alpsankhyak aur bahu sankhyak ki rajniti kareinge to yahi hoga, Jammu Kashmir mein ek taraf algawwadi takatein Congress ko hata rahi hain, wahan ke Hinduon ko nicha dikhane ke liye tarah tarah ke hathakande apanaye ja rahe hain, yah sab ek taraf ho raha hai aur doosari taraf yahi sarkar Confidence motion mein unhi tatvon se haath mila rahi hai, jo desh droh ka kaam kar rahe hain, yah kaisi rajniti hai ?

 

Is tarah se to ham kabhi bhi ATANKWAD se nahin lad payeinge, yah sab aise hi chalata rahega, kab kahan, kis jagah visphot ho jaye, ek aam baat jab hone lagegi to yah desh, philistin, isarael, iraq , pakistan aur afghanistan banatey huye der na lagegi.

 

Atankwad ke khilaf is tarah ka napunshak rawaiya sare desh ko le dubega.

Bangalore Blast ke pichche “Simi aur Huji” ka haath

Modus Operandi ke hisab se yah kaam SIMI saur HUJI ka lagata hai, jis tarah se blast kiye gaye hain , usase to yahi lagata hai.

 

Banaras, Lucknow, Hyderabad, Malegaon, Ajmer sharif, Jaipur mein jis tarah se blast ka tarika apanaya gaya hai, yah pahale drastikon mein to SIMI aur HUJI ka hi is mamale se sambandha banata dikhayi de raha hai.

 

Isake pichche karan kya ho sakatey hain ? ek to Atankawad ki philosophy ko jinda banaye rakhana , taki logon ko barabar yah ahasaas hota rahe ki “Atankwadi chup nahin baithe hain, jab bhi gahe bagahe mauka milega, is tarah ke visphot kiye jayeinge” , doosara Arthik stithi ka davandol karana, Bangalore ek sthapit IT Sector ka Hub ban chuka hai, ise damage karane se , swabhavik hai , kuchc dahasat to phailegi hi, jisase karobar par asar padaega, yah to tay hai.  teesare, jitane bhi jagahon par blast huye hain , ve rajya, BJP shashit ya gair congress shahit rajya hain, isaliye yah ho sakata hai ki Kendra aur Rajyon mein tanatani aur aichatani hone lage , jaisa ki aamtaur par hota hai, chauthe is baar ke blast mein ek vishesh baat yah dekhane mein aayi hai, ki jis tarah ki visphotak samagri ka istemaal kiya gaya, vah jyada powerful nahin thi, jisa ki media ki reportsmein bataya gaya ki bam ka blast jo bhi hua hai, ve jyada shaktishali nahin the, unamein nut bolt aadi bhare huye the, is vajah se  log ghayal jyada huye, lekin mare kam, isase yah sandeh paida hota hai , ki atank failane walon ki mansa kya thi, kya ve janbujhakar chahatey the ki Log dhamake se marein nahin, kewal ghayal hon ? Aisa ho sakata hai, kyon ki musalamano ke maulanaon ne pichchale kuchchc mahine pahale yah phatawa jari kiya tha ki Atankwad musalamano ke liye haram hai aur jayaj nahin hai. Ho sakata hai  atankawadiyon ne apana existence barkara rakhane ki liye, yah vichar kiya ho ki Visphot to kiye jayein, lekin isase kisi ki maut na ho, bhale hi log jakhami ho jayein.

 

Mujhe to yah SIMI aur HUJI ka hi milajula kaam lagata hai. Baki janch agenciyan , kya batati hain , isake liye to intazar karana padega.

Electronic Media ke bik gaye patrakar

Electronic media ki dhare bandi bhi paramanu deal par samane aa gayi, ye bhi expose ho gaye hain, jis tarah ki dalilein samane aa rahi hain, ve koi shubh lakshshan nahin dikhai de rahe hain.

 

Noton ki gaddiyan laharayi gayin, Desh ki sarvochch panchayat ke andar, aur betuke sawal utha rahe hain media wale. Jis tarah se Arushi hatyakand ka in media walon ne sarvanash aur satyanash kar dala, usi tarah se ye is Note kand ko bhi jamindoz aur bhumigat  kar dalenge.  ya pata nahin kis prajati ke  khoji patrakar hain.

Maine bhi patrakarita ki hai, lekin usulon ke saath. main bhi press photographer raha, maine bhi badi badi hastiyon ke interview liye hain aur news coverage ki hain, lekin is tarah se nahin jaise ke aaj ke patrakar kar rahe hain. Yah sharmanak hai, ise main  sivay “pita Patrakarita” ke alava kuchch bhi nahin kah sakata. In Patrakaron ko maryada tak ka khayal nahin hai, na desh ke hit ki baat inake jehan mein aati hai, ye sirf apana dekh rahe hain , ki kab sham ko daru ki botal mile, aur kisase mile, kahan se rakam mile aur kya kiya jaye jisase unaki jeb bhare, ye bike huye patrakar hain. Aise  patrakaron ke baare mein mujhe andar tak pata hai, lekin jaban kholane ki jahamat nahin uthana chahata hun, yah sab andar ki baat hai aur  bahut achchi tarah se janata hun.

 

Sawal yah , hai ki jab , sting operation electrotnic media ke patrakaron dwara kiya gaya, to yah janata ko kyon nahin upalabdha karaya gaya ?  Kya isamein bhi saudebazi ho rahi hai ?  Mujhe to yahi lag raha hai,  ki is kaand se sambandhit patrakar Rajnitigyon ke hathon mein bik gaye.

 

Chauthe khambhe ka is tarah ka ravaiya sandeh  aur Shanka se bhara hua hai.

“Democracy” haar gayi, “beimani” jeet gayi

Sharmanaak aur behad sharmanaak, aisa kabhi dekha nahin , aisa kabhi suna nahin, Sansadiya itihas ka kala din, yeh din sacche Rastravadion ko bhulega nahin, itani ghanghor beimani, had ho gayi,

 

Yeh ek behad galat parampara pad gayi hai, isase bachane ka ab koi rasta nahin bacha, naitik mulyon ki maut ki jimmedar Congress Party ne , itani khatarnak parampara bana dali hai, jisaki kimat deshvasiyon ko bhavishya mein chukani hogi,

 

Ab is parampara ke pakshsha mein aur vipakshsha mein tamam tarah ki dalilein Rajnitigyon dwara di jeyeingi, ise jayaj thaharane ke liye tamam tarah ki dalilein aayeingi, kyonki yahi aaj ki rajniti hai, aaj ki, jo sirf paise aur kewal paise ke hit ke liye ki ja rahi hai, aur aisa karane se desh kahan ja raha hai, isase in rajnitigyon ka  koi vasta nahin,

 

Desh ke nagarik sab dekh rahe hain, pahale bhi dekha chuke hain, kitane bhrastachar ke mamale samane aaye, lekin kab, kise, kya yad rahata hai ? Kuchch dino baad sab bhul jayeinge, janata kahan tak yah sab yaad rakhegi ? Jis desh ki janata ko abhi yah tak nahin malum, ki usake adhikar aur kartavya kya hain, sarkar ki karya pranali kya hai, sansad kya hai, vidhan sabha tak ka nahin pata, ki kya hai, aise desh mein Lokatantra kitana paripakva ho gaya hai, ise samjha ja sakata hai.

 

Maine pahale bhi kaha tha, aaj bhi kah raha hun, ki yah sab hamari galati hai, is desh ki janata ki galati hai, jo aise tatvon ko chunakar bhej dete hain, jo sivay sude bazi ke , inaka doosara mission nahin hota, kahan se kya mil jaye, is par nigah rahati hai ?

 

Yah hamari democracy ka sabase kamjor pahaloo hai, ise bachane ke liye, kuchch na kuchch thos upay karane honge, yah karana pdega, nahin to is desh mein democracy ke naam par jis tarah ke aur mamale ayenge, usase democracy chalane walon par hi sawaliya nisan lag jayeinge.

 

Main Bhartiya Sansad ke andar hui aaj ki ghatana se hatash hun, nirash hun, dukhi hun, isaliye ki main is tarah se ki gayi beimani ke khilaf kuchch kar nahin sakata, mere haath mein koi shakti nahin hai, main itana hi kah sakata hun ki “Democracy haar gayi aur Beimani jeet gayi”