Desh ki suraksha ka sawal

Ab yah dharana gaharati chali ja rahi hai aur ab desh ke logon ko samajh mein aane laga hai ki maujuda Sardar Man Mohan Singh ki sarakar atankwad ke mamale mein, apane ghutane tek chuki hai aur yah sarkar atankavadiyon ke samane surrender karati nazar aa rahi hai. Is sarkar mein atankvadiyon se ladane ke liye koi ichcha shakti hi nahin bachi hai, jo bhi hai vah sab lipa poti hi nazar aa rahi hai.

 

Hona yah chahiye tha ki samaj ke sabhi vargon aur jatiyon ke logon ko ek jut hoker is trasadi ka muqabala karana chahiye tha,  aur ho yah raha ha ki kendra sarakar apani rajnitik chalein chal rahi hai, apane pap ka thikara doosare ke mathe madh rahi hai. Maine apane pichchale post mein kaha hai ki Atankavadiyon ko sharan kaun de raha hai ? Kaun paisa de raha hai ? Kaun aadami muhaiya kara raha hai ? Kaun RDX jaise jwalanshil padarth upalabdh kara raha hai ? Kaun hai jo, shahar ke un sthano ko batat hai, ki yahan yahan par kaun kaun se dinon mein kitani bhid rahati hai ? Kaun sahayta  karata hai aise logon ki ?

 

Hame inake jawab dhoondhane honge ?  Yah kaam itana asan nahin hai, isake pichche jana hoga. Mujhe lagata hai ki, pratibandhit sangathan SIMI ke kuchch karyakarta sthaniya star par bahar se aaye atankiyon ki madad kar sakatey hain. Yah to jag jahir hai, ki sabhi aatanki sangathan ek doosare se jude huye hain, aur ve ek doosare ki madad bhi kar rahe hain. Kyonki itane bade paimane par kisi badi ghatana ko anjam dena , bahut saral kaam nahin hai. Isake liye pura plan kiya gaya hoga, mujhe lagata hai ki yah kaam SIMI aur HUJI ke milejule sahayog ka natiza hai. SIMI ki modus operandi DANGE bharakane ke vicharon par adharit hai, doosari taraf HUJI is tarah ke visphoton ko karane mein mahir hai. Iske pichche ka darshan yahi ho sakata hai, ki visphot karake logon ko uttejit kiya jay, taki dange bhadak uthein aur in dono sangathano ka maqsad pura ho jaye.

 

Mera ankalan hai, ki do vichardharaon ko ek mein milakar yah ho sakata hai, kyonki maqsad to atankwad ko failana hai.

 

Ab sawal yah hai ki desh ki suraksha ka kya hoga ? Stithi vastava mein bahut gambhir hai, kewal aur kewal dridh ichcha shakti se hi is par kabu paya ja sakata hai. Kuchch kamiyan avashya hai. jaise ki hamara police ka system, har rajya ka alag alag police vibhag hai, kisi rajya ke doosare rajya ke police system se koi talluk nahin. Isake liye jaroori hai, ek kendriya police invetigating agency ki, jo sare desh mein kahin par bhi jakar aise mamalon ki gaharayi se janch paratal kar sake, aisi agency ko vah sab adhikar diye jayeh , jaisa ki america ki federal jaanch agenciyon ko prapta hai.