Bhartiya Janata Party ki maujuda rananiti

BJP ne samay ki nabja pahachan kar apane 06 condidates ka khulasa karake, aur Kanpur shahar mein LKAdvani ki rally karake  ek tir se kai shikar kar diye hain.

 

Pahala yah ki desh ki janata ke samaney  is baat ka sandesh chala gaya hai, ki ab aam chunav samay se pahale hone ki sambhavana ho gayi hai, isaliye desh ki janata ab kamar kas kar is baat ki taiyari kar le , aur is chunava ke liye desh ki janata apane ko manasik taur par taiyar kar le. Desh ki janata ko is chunav mein kisako jitana hai, yah tay kar le.

 

Dusara yah , ki UPA sarkar ke ghatak dal ab apana apana existence bachane ke liye kya karenge aur unako kya ranniti banani aur samajhani hai, ve yah tay kara len, kyonki in sahayogi dalon ne kaphi din tak mauj manai hai aur malai kaati hai. Ve kya mudda lekar election ke liye janata ke samane ayeinge.

 

Teesara yah ki BJP ka khulakar aane ka matalab yah hai ki Congress ko kya karana aur samajhana hai, unake sahayogi dal chunav chahatey hai ya nahin, is baat ka dababv bhi badhana hai. Kyonki ander khane koi nahin chahata ki chunav samay se pahale hon, lekin is tarah ka dabav banane se kuchch na kuchch khalbali sahayogi dalon mein jaroor machegi, jisase manasik taur par sakriyata badhane ki ummid hai.

 

Chauthey yah ki BJP is samay tehuna dhar kar jis prakar ki hunkar bhar rahi hai aur mauke ka phyada uthana chahati hai, agar yah sandesh UPA ke ghatak dalon tak pahunch raha hai to shayad yah chunav kuchch samay ke liye tal jayein, is tarah ka dabav BJP ki taraf se aparochch roop se UPA ke ghatak dalon ko pahuchane ka hai.

 

Panchavein, Election to tay hai, yah abhi hon ya kuchch mah baad, BJP ke liye yah rehersal ka kaam hoga. Karyakarta bhi sakriya honge, anusangik sangthan jo kaphi dinon se bina kaam baithe the, unako kuchch mahinon ke liye sakriya hone ka mauka mil gaya hai.

Nepal mein ab kya hoga ?

Mujhe Raja Gyanendra ji ka jaane ka bahut afsos hai. Unhe jis tarah se bemuravvati karake hataya gaya hai, vah sarahana yogya to katai nahin kaha ja sakata hai. Jo desh apane poorvajon ka samman nahin karata hai, bhale hi ve kaise rahein hon, vah samman ke yogya bhi nahin hai.

 

Raja to chale gaye, ab praja aa gayi ? Kya gaddi samhalatey huye ye praja wale Nepal ke halat mein krantikari perivaratan la payeinge ?  Mujhe nahin lagata ki koi amoolchool parivaratan ho payega. Mao vadion ke target the Raja Gyanendra Ji, inhone Nepali janata ke bich yah shagoopha phailaya ki Maovadi agar satta mein aate hain to nepalion ki durdasha sudhar jayegi. Ab maovadi aa gaye, kya parivartan hua ? Ulate samasya yah aa gayi ki vahan sarkar chalana mushkil ho raha hai.

 

Mujhe shanka hai ki Nepal ke din kabhi bahurenge. Karan yah hai ki is desh mein na to kheti ke liye sapat jamin hai, na inake paas koi khanij bhandar hai, na inake yahan kisi kisma ki koi khas infra structure facility hai, na inake yahan koi experts hain, sabhi jaruri chijon ka abhav hai, aise mein ye neta kya kar lenge. Jabani jama kharch se sarkarein nahin chalati. Is utha patak ke mahol mein videshi niveshak apana kimati dhan kyon lagayeinge ? Yahan kyon log anana pasand karenge ? is anishchitata ke mahaul mein abhi vashon tak nepal ko is baat ka intazar karana padega, ki unake yahan dhan lagana surkshshit hoga ?

 

Pahahle ek Raja tha, jisaki credit ki vajah se videshi bhi apana dhana laga dete the, videshi sahayata bhi mil jati thi, jisaka upayog kuchch na kuchch raja ke bhay se samaj ke kalyan ke liye upyog ki jati thi. Ab kya stithi hogi ? Yahan sabhi Raja ban rahe hain, raja banane ki liye hod machi hai, Nepal ki arthik halat din ba din kamjor hoti ja rahi hai, aise mein is vishwa vyapi mandi  aur mahangayi ke daur mein Nepal ko kaun kitani sahayata de sakega , yah kahana bahut kathin hai.

 

Bahar Nepal ek chakravyuh se mukta hoker doosare isase bhi adhik kathin chakravyuh mein phans gaya hai. Mujhe nahin lagata ki , is kathinayi ke daur mein Nepal kuchch sudhar kar payega.

Kya Lok sabha Chunav Hone ki kagaar par aa gaye ?

Yah sawal sabhi desh wasiyon ke samaney hai, ki kya ham Loksabha ke chunav ke liye taiyar ho jayein ?

 

Abhi mahaul to aisa nahin lagata hai, jaisa ki logon ka ankalan hai, ek do pakahware mein to kuchch bhi nahin hone wala, par jaisi rassakashi ho rahi hai aur aichatani jari hai, usase to yahi lagata hai ki kuchch na kuchch to hoga jaroor.

 

Mera ankalan yah hai, ki abhi july mahina aur agast mahina tak to noora kushti chalegi, dhamakane aur manane tatha ek doosare ko dhaus patti dene ka silsila jari rahega. September aur October ye do mahine Bhartiya Rajniti ke liye bahut crucial honge. In do  mahino  mein sambhavana hai, ki Congress koi aar paar ka nirnaya legi, aur parmanu karar par sidhe hi America se baat karegi, baam dal chahein jitana ho halla machayein, tab tak kaam lag chuka hoga. Sarkar yadi alpamat mein bhi aati hai to yah nirnay hoga Loksabha ke andar. Jaisa ki sabhi janatey hain ki Rajnitik dal kab kya gul khila dein, koi nahin janata. Jab tak ho halla machega tab tak aa jayega december, sarkar bache ya gire , itana samay nirvachan aayog ke paas rahega ki vah aaram se election kara sake, idhar January ke akhir tak nai sarkar banakar aa jayegi.

 

Is dhamachaukari ke bich mein congress ko kahane ka mauka mil jayega, ki hamane bahut koshish ki, America bhi khush aur bhartiya janata bhi khush. 

Parmanu karar par ho rahi noorakushti

Pichchale kai mahino se parmanu karar par aaye din Congress aur bampanthion ke bich mein bade joron se noora kushti ho rahi hai, andarkhane kuchch na kuchch hai jaroor, shak to yahi hota hai. Hai koi na koi baat , jise is desh ki janata se chchipaya ja raha hai, isi vajah se bam panthi adanga daale huye hain.

 

Pahala karan to samajh mein aata hai, ki bampanthi isaliye parmanu niti ka samarthan nahin kar rahe hain , kyonki yah samajhauta America se kiya ja raha hai, yahan yah baat samajh mein nahin aati ki China ne kah diya hai ki is samajhautey se use koi pharak nahin padane wala, china ka yah kahana bhi sandigdha lagata hai, chunki china khullam khulla is samajhautey ka swagat karane se raha, isaliye vah chup hai, unake bhartiya gurge Bampanthi vahi sab kaam kiye de rahe hain , jo china chahata hai,

Doosari Baat Bampanthi ad gaye to ad gaye, samajhauta nahin hona hai to nahin hona hai, itane din baad agar bampanthi koi muravvat is samajhaute ke liye karate hain to kirkiri bampanthion ki hogi, aba yah mamala lagata hai “Prestige issue” ka ban chuka hai. Yahan sawal kredibility ka bhi hai.

 

Teesara UPA ke sabhi ghatak dal bhi nahin chhatey ki yah samajhauta ho, unhe dar hai ki agar samajhauta hua to sara shrey Congress ko milega aur unako sivay lollypop ke kya milega, malai chchanenge Congressi aur kham thonk kar Congressi kahenge ki yah sab hamara kiya hai, UPA ke gahtak dal sivay baal ukhadane ke aur kya karenge.

 

Vaise bhi is karar ka virodh ho raha hai, agar yah isaliye kiya ja raha hai ki isase bijali utpadan badhega to Bharat sarkar ko yah samajhana chahiye ki unake yahan is tarah ki technology maujud hai, ve kyon isake liye itana jor aajmaish kar rahe hain ? Mujhe daal mein kaala najar aa raha hai . Koi na koi baat is desh ke longo se chchupai ja rahi hai. Abhi koi spast baat samane nahin aayi hai. Na hi kisi baat ka khulasa kiya gaya hai. Shak sarkar ki niyat par hai.

 

Main Bampanthion ke is ‘stand’ ka samarthan karata hun. 

Tushtikaran ki niti kab tak ?

Bharat desh mein neton aur rajnitik dalon dwara Tushtikaran ki bayar isaliye chalayi gayi taki unaka vote bank majboot ho jaye, aur jaldi jalada unako koi satta se na hata sake. Pahale yah kaam Congress se shuru hua, phir dhire dhire yah bimari sabhi rajnitik dalon mein phail gayi. Shuru mein is bimari ke infection Chaudhari Charan Singh se shuru huye, in sabaki philosophy ke pichche  Dr. Lohiya ka vichar tha ki congress ko hatane ke liye sanyukt vidhayak dal ki kalapana karani chahiye aur use amal mein lana chahiye. Chaudhari charan singh ne Bhartiya Kranti Dal banakar sabase pahale kursi hathiyayi. Isiliye Chaudhari Charan Singh ko “Chaudhari Chair Singh” kaha jane laga. Chaudhari sahab pahale congressi the, aur achanak pala palat kar krantikari ban gaye. Inake jamane mein Jatvad ne itani unchaiyan pakari, ki baki bachi jatiyon ko isase irsha hone lagi. Is tarah se dharebandi shuru huyi, kyonki isame sabako phayada nazar aya. U.P. mein jitane bhi jaat adhikari the ve powerful ho gaye baki sab dhakkan ho gaye.

 

Yah tushtikaran ki shuruaat thi, iski nabj Chaudhari ne pakadi aur ve ise pakad kar Pradhan Mantri tak ban gaye.

 

Is Gurumantra ne aisa infection failaya ki sabhi dal isaki chapet mein aa gaye, ek se badhakar ek tushtikaran ke liye chalein chali gayin, aur ab ham usake parinam bhugatane ki shuruaat mein aa gaye hain. Gujaron ka andolan hame ek seekh de gaya ki “Jor jabardasti karake bhi haq hasil kiye ja sakatey hain”. Mera yah ankalan hai ki is kamjori ka phayada uthakar ab har rajya mein koi na koi baval hone lagega. Isaki shuruaat ki jhalak bhi aa gayi hai. Gorakaha land ka mamala garama raha hai. Abhi aur bhi mamale garam hokar ayenge. Yah sab tushtikaran ka aur hamare rajnetaon ka lolypop pakadaane ka natija hai.

 

Isamein dosh is desh ki janata ka bhi hai. Jab sabako jhunjhuna pakadaya jayega, to yah to hona hi hai. Is samay haal yah hai ki buniyadi jaroorat ki chijein bhi nahin mil rahi hain.

 

Ek udaharan deta hun, maine apani Cooking Gas 19/05/2008 ko book karayi thi. Aj [23.06.2008] tak mujhe gas nahin mili hai. Main do baar gas agency jakar kah chuka hun, pichchle teen dinon se mera ek sevak khali cylinder lekar Gas agency jata hai aur bina gas liye vapas aa jata hai, yah kahakar ki “aaj bhi Gas cylinder lekar gadi nahin aayi hai”.

 

Mujhe AB Vajpeyi ki sarakar ke ve din yaad aate hai, jab main gas ke cylindaron ke liye kabhi gas agency nahin gaya. Gas company vale cylinder lekar ghar ghar jate the aur poochch poochch kar cylinder dene aate the, vah bhi Rojana, aisa lagata tha jaise Gas Cylinder aloo pyaj ki sabzi ki tarah se bikane wali chij ho gayi hai.

 

Yah sarakar Bade Bade Arthashashtriyon ki sarkar hai, jisaka hal yah hai ki aam aadami buniyadi jarooraton se maharoom hai. Mujhe to aisa lagata hai, ki is sarakar ka apane vibhagon se  control khatam ho gaya hai, aur is sarakar ke naukar apani manamani par utar aaye hain.

 

Kamjor sarakarein kisi ka bhi bhala nahin kar sakati, yah khatarnaak sanket hai.

Desh Ke Halat Achche Nahin Hain

Vartaman mein desh bahut kathin paristithion se gujar raha hai. Congress ki samprag sarkar ne is desh ke nivasiyon ko aisi vikat paristithion mein lakar chchod diya hai jisase ubarana bahut mushkil lag rah hai. Yah sach hai ki lok lubhavan ghosanayein karake koi bhi party vote hathiya karake apani parti ki sarakar bana sakati hai lekin aisi sarkarein hamesh bahut kamajor jamin wali hoti hai. Yahi hal is sarkar ka hai. Jabase yah sarkar aayi hai, isake banane se lekar aaj tak ka hal aapane dekha hoga. Congress ne Samajwadi Parti ko is sarkar ke gathan ke liye bulaya hi nahin tha. Yah to Comerade Sardar Surjeet ji the, jinhone sarkar banane ke liye pahal ki aur Amar singh ko lekar saath mein gaye the, jinako kisi congressi ne ghas tak nahin dali, tamasha dekhiye , yahi Samajwadi kendra mein sarkar mein shamil rahe, aur congressi inako galiyan dete rahe, jab yah U.P.  mein sarkar chala rahe the. Amar singh ne Rahul gandhi ko khijhakarake kah bhi diya tha, ki ” abhi ve launde hain”.

 

Samprag sarkar ki sabase badi galati yah rahi ki inhone aate hi aate , Rajmargon ke jodane wali swarnim chaturbhuj yojana  par viram laga diya. doosari galati yah rahi ki inhone bahut si commodities ko satte bazar mein satte ke karobar ke antargat le aaye, yahan tak ki khane pine ki chijon par bhi, isase bahut si chijon ke daam asaman chchute chale gaye, sarkar kewal sensex dekhati rahi ki vah kis speed se badha raha hai, inhone yah dekhane ki jahamat hi nahi uthai ki isake kya parinam honge, ab jab sensex ki halat din pratidin kharab hoti ja rahi hai tab aage kya hal hoga , yah to bhagawan jane, lekin jis tarah se halat bigar rahe hain, hamein jyada behatari ki ummig nahin karani chahiye.

 

Apani nakamyabi ka thikara hamare rajnitigya doosare ke upar phodane se baz nahin aate. Yahi ab ho raha hai, aage bhi hoga, bas desh ki janata kim kratavaya vimoodha hokar yah sab dekhegi, aur janata sochegi ki ham kaise jiyein.

Parasi samuday ki ghatati jan sankhya

Mumbai ke log Batate hain ki apane desh ki swatantrata se pahale, desh ke Parasi samuday ki jan sankhya karib char lakh ke aas paas thi. Ab yah jansankhya ghatakar lagabhag 75 hazar ke aas paas aa gayi hai, Isaka karan kya hai, yah maine janane ki koshish ki, jo bhi facts samane aaye hai usase yah lagata hai ki, parasi samaj ki yah samasya unaki apani hai aur ab samay ki jaroorat hai ki ve is samasya par vichar karein.

 

Mera bahut se parasi parivaron se mel milap hai. Main aksar unase pochchata hun ki ve apani janasankhya badhane par dhyan kyon anhin de rahe hain. Ek baar ek parasi sajjan mere paas aaye, unake saath unaki dharam patni bhi thi aur do bachche bhi. Maine unase yah janane ki koshish ki , ki unaki jansankhya  kyon kam hoti ja rahi hai ?

 

Mujhe kuchch batein pata chali, pahali Parasi samuday ke ladake shadi ke anikshuk hote hain, kyon ? isaka javab yah mila, ki parasi samuday ke logon ke rahane ke style bilkul alhada tarike ke hain, yadi ve shadi kar lete hain to unake rahane ke style aur shano shaukat mein fark padega, jise ve bardashta nahin kar sakatey, is badhe huye kharch ko bachane ke liye, ve shadi nahin karate hain. Doosara, yadi ve shadi karenge to jahir si baat hai, unake kharche bhi badhenge, yah ek aur vyakti ka kharcha unake bajat se bahar ki baat hai, isiliye ve soch samajh kar shadi karatey hain aur bachche bhi kam paida karane mein ichcha rakhatey hain, mamala saaf hai ki yah aabadi ka masla Parasiyon ki arthik stithi se juda hai.

 

Aam taur par parasi samaj ke log, Rajniti jaisi baton se door rahatey hain. Mumbai mein Sanjan ke pas Mumbai ki Parasi samaj ki seva karane wali ek mahila Meher Master Moos ne Zorostrian Foundation sthapit  kiya hai, mujhe ek parasi sajjan bata rahe the, ki yahan par ek time capsule jamin ke andar chchoda gya hai, taki jab Parasi samaj ke log vilupta jatiyon mein ho jayein, tab unake bare mein janakari is time capsule se jaye.

 

Yah to samay hi batayega, ki kya hoga ? Philhal is disha mein PARASI SAMAJ ke logon ko batana chahiye ki ve apani jansankhya kaise badhayein ? Mera to yahi mashwara hai, ki Parasi samaj apni janasankhya kam se kam 4 lakh to avashya hi le aaye. Bachche paida karane ke liye Parasi Mahilaon aur Parasi Navyuvakon ko aage ana chahiye. Main Parasi samuday ko vilupta hote nahin dekhana chahata. Meri ichcha hai ki ve anant kaal tak apani pahachan is duniya mein banaye rakkhein.

Kya hamein Tantra Mantra par vishwas karana chahiye ?

Kuchch varsha pahale, meri patni kisi mandir se kuchch rakam kharcha karake, ghar mein dhan badhane hetu, Garibi door karane ke liye , kuchch samagri le aayi. Ise pooja sthal par badi shradhdha ke saath sthapit kat diya gaya. Ab roj isaki pooja karane ke liye, meri patni ne kaha.

 

Swabhavik hai, ghar mein rahana hai, to baat to manani hi padegi, isaliye maine kaha ki “theek hai, rojajan pooja kar doonga”. Patni ne doosara sawal khada kiya, ki , ” Rojana jitana dhan paida karate ho, vah sab isa par rakha diya karo, aur raat bhar isi par rakhakar subah jahan rakhana hai, vahan rakha dena. ” Maine aisa hi kiya, main roj kamata hun, aur roj kharcha karata hun. Karza dene ke liye badi mushkil se katarbyont kar , kisi tarah se karza chukata hun.  Ab hone yah laga , ki meri roj ki kamai , badhane ki bajay, ghatane lagi, hal yah ho gaya ki meri rojana ki amadani kai kai dinon tak shoonya ho gayi.

 

Ab ghabarana to lajimi tha. Maine dhyan dena shuru kiya ki abhi tak to sab thik thak chal raha tha, yah achanak kya ho gya. mere dhyan mein aaya ki meri patni jo yantra layi hai, sab isaki karamat lagati hai. Usi din se maine us yantra ke chakkar mein paise rakhane band kar diye. Dhire dhire mere kaam ki gadi patari par aane lagi. Din bitate chale gaye, maine socha, Yah SHRI YANTRA , jo meri patni layi hain aur pooja ghar mein rakkha hai, ke saath aisa sanyog ho sakata hai ki meri roaj ki kamai par kami aa gayi ho. Hazaron log , isaki pooja karate hain, kisi ne aisi shikayat nahin ki, Yah mahaj mere saath mein sanyog ho sakata hai, lihaja kuchch mahino baad  amine phi SHRI YANTRA ki pooja karani shuru kar di, mere saath me phir vahi chakkar hone laga, is baar bhi maine kuchch dinon ke baad pooja karana band kar diya. Phir gadi patari par aane lagi.

 

Teesari baar , phir yahi hua. Mera matha thanaka, maine vichar kiya, ki is tarah ke anusthano se bachana chahiye.

 

Ek pandit ji ne mujhe salah di ki main Moonge ki anguthi pahanu to mere din phir jayenge. Din to nahin phire, lekin meri ungaliyon mein, khal katane lagi aur ek khas tarah ki allergy aur twacha ki bimari hone lagi, ise bhi maine kai baar pahan kar aur utar kar isake phal ke baare mein samajhane ki koshish ki. Mera anubhav is prakar ke tantra mantra aur vishwas par kam jamata hai.

 

Main kuchch chijon par vishwas jaroor karata hun, jaise ki kul dewata  ya  Miya bhaiyon ke Saiyyad Baaba. Mera makan kisi jamane main musalman bhaiyon ka tha. Abhi kuchch varsh pahale, jab main bahut pareshan hal tha tab, ek miya bhai ke kahane par maine apane ek kamare mein, ek ALA banakar usame rojana SAIYYAD BABA ke naam se Deepak jalana shuru kiya. Sanyog ki baat yah hai, ki is prakriya ke karane ke baad se mere kashton mein kami aayi, jin baaton ke liye main pareshan rahata tha usamein kami aayi aur  mujhe bahut kuchch rahat mili. Main aaj bhi rojana dipak jalata hun aur ise kabhi bhulata nahin.

 

Isake pichche ek logic yah ho sakati hai, jo main sochata hun. Jab yah makan bana hoga , tab ise banane walon ne bahut takalif aur kast uthakar ise bahut pyar se banaya hoga, unaki bhavanayein isake saath nishchit hi judi hongi. Na jane kitani baar is makan mein Pavitra Kuran ka paath kiya gaya hoga, na jane kitane log , bade budhe, bujurga is makan me rahe honge aur is duniya se kuch kar gaye honge, unaki kya ichchayein rahi hongi. Miyan bhai the, isaliye unaki kabrein bhi , sthaniya kabristan mein hongi, unaki aatmayein kya is makan se nahin judi ho sakati hain ?

 

Yah sochakar, maine rojana deepak jalane ka vichar kiya, kaha bhi gaya hai, bujurgon ke naam makan mein rojana unaki yaad ke liye deepak jaroor jala dena chahiye, taki unaki aatma ko yah na lage ki unake ghar mein koi deepak jalane wala bhi nahin bacha.

Bujhi Atma ke logon ka Bharat Desh

Kya ho gaya hai is desh ko ? Kya is desh ki atma mar gayi hai ? Kya yah desh anathon ka ho gaya hai ? Kya yah desh sambhale nahin sambhal raha hai ? Bahut se sawal hain, jinaka uttar dhoondhana hoga, kyo aisa ho raha hai ?

 

Is Desh ki atma bujha chuki hai. Is desh ke logon ka khoon pani ho chuka hai. Kabhi Inqlab ka nara lagane wale , mutthi taan kar samajwad lane walon ko lakawa ki bimari lag gayi hai. Akhir kyon ? kya wajah hai ? Hamare oopar atyachar ho ta rahe aur ham chup baithe rahein, is manasik napunsakata ka jimmedar kaun hai.

 

Jawab bhi sida sada hai, ISAKE LIYE JIMMEDAR IS DESH KI JANATA KE ALAWA AUR DOOSARA KOI NAHIN, is desh ki janata ki tulana main SODA WATER  ki bottle se karata hun. Soda water ki bottle jab khulati hai, to badi tezi se uphan marati hai, jhag badi tezi se nikalata hai, Gas bhi badi takatwar hoti hai, is uphan ka josh tez kisma ka hota hai. I desh ke logon ka bhi yahi haal hai, janata ubalati badi tezi se hai, jaise hi gas nikali, pichak kar sab dhile ho jate hai aur vyavastha ko gali dekar apane apane  kaam mein lag jate hai.

 

Main yah sab Jawahar Lala Neharu ke jamane se lekar Manmohan singh ke jamane tak dekhata chala aa raha hun. Inqlab aue Kranti jaise shabda raddi ki tokari mein chale gaye hain, ab sab yahi sochate hain ki koi Bhagart singh hamare ghar na paida ho, koi chandra shekhar unake ghar na paida hon , agar paida hon to Harshad Mehata aur lambi rakam ka ghotala karane wala paida ho.

 

Jahan is tarah ki manasikata hogi, wahan kya hoga ? Jahan sab loot khasot machane wale hon wahan kya hoga ? Is kamjori ka phayada aj ke neta nahin uthayenge to aur kaun uthayega ?

 

Main to yahi kahoonga ki is desh kiatma mar chuki hai, yah murda mansikata walon ka desh ho gaya hai.

Dainik Jagaran: Aaadi sampadak Swargiya Poorna Chandra ji Gupta se judi yadein

 

 

“ Chacha ji “ ki dharamapatni , jinhe main “Chachi ji”, kahata tha, bahut dharmik aur karmakaandon mein vishvash rakhane wali mahila thi. Unhe main rojana ek nishchit samay mein , pas ke madir , MATA TEPESHWARI  DEVI  ke mandir mein jate huye dekha karata tha. Ve  Ishwar  mein bahut vishwas rakhane wali mahila thi aur navaratron mein ve vishesh pooja archana karati rahati thi.

 

Chachi ji, bahut sunder aur Chacha se roop rang mein bees thi. Chacha kuchch gehuye rang ke the, aur chachi bahut gori aur sundar nak naksha wali thi. Ve bahut dhimein bolati thi aur hamesha jab ghar se bahar nikalati thi, to ve apana sir odhani ya dhoti se dhaka liya karati thi. Ve kabhi akele mandir nahin jati thi, koi na koi unake saath jaroor jata tha. Ve ek haath mein bahut shraddha ke saath  thali mein pooja ka saman  rakahati thi aur use ek safed  crosiya se bine hue  cover se  dhak deti thi.

 

Unake sath mein,  aksar Yogendra Mohan {agar main sahi naam nahin bhul raha hun to , yani sabase chchote Bhaiya, jo meri umra ke hain} MATA TAPESHWARI MADIR jaya karate the. Ek din unake saath koi Mandir jane wala nahin tha, chachi ji ka mandir jane ka samay kuchch adhik ho gaya tha, tabhi main pahunch gaya. Main rojana Chachi ji ko mandir jate huye dekhata tha, lekin kabhi unake saath jane ka mauka nahi mila tha.

 

Jaise hi main pahuncha, chabutare par baitha hi tha, samanewale chabutare par chacha ji kuchch kar rahe the, mujhe dekha, fauran  khabar bheji, Chachi niche aayin, Chacha bole “  Isako saath lekar jayein ”. Main bada khush hua, maine chachi ke haath se Pooja ki  thali pakadi aur unake saath  pichche pichche chalate huye Mata ke mandir  gaya, Chachi ji bade bhakti bhav aur manoyog se pooja karati rahi. Aisa kai baar hua. Kabhi kabhi main aur surendra mohan dono hi chachi ji ke saath saath jate.

 

Bade bhaiya Narendra Mohan mujhase bahut bade the. Ve safed kamij aur safed paint pahanate the. Adhikansh samay maine unako isi dress mein dekha hai. Ve college se cycle par vapas aate samay mujhe mila karate the. Maine unako  chacha ji se baat karate huye bahut kam dekha. Ve ghar aate, phir sidhe kahin chale jaate Main unase bahut darata tha aur unase kabhi bhi baat karane ki himmat nahin ki. Han, kabhi kabhi main unase  kuchch poochcha liya karata tha. Jisaka uttar ve sahaj bhav se diya karate the.

 

Beech wale bhiya , Mahendra Mohan, ke bare mein mujhe jyada kuchch yad nahin hai, smaran mein koi khas baat nahin dhyan mein aa rahi hai.

 

Chchote wale bhaiya meri umara ke  hain. Agar main nahin bhul raha hun, to unako Yogendra Mohan ke naam se pukarate hain. Un dino MCC Cricket teem Kanpur ayi huyi thi jisake kaptan Alegzender tha aur Green Park ke maidan mein match khela ja raha tha. Sham ke samay aaspaas ke ham-umra ke ladake ikaththa ho jaate aur Cricket ki baate kiya karate, jahir hai main bahut kam bolata tha, Yogendra mohan ko kuchch jyada hi gyan tha isaliye vahi sabase jyada batalate rahate the.   Yogendra aur unake doosare sathi , jo bagal ke makan Ram Kuti mein rahate the tatha birhana road ke doosare ham-umra ke saath rojana sham ko ikaththa ho jate the aur Nomani Bhawan ke  samane ki sadak par cricket khela karate the. Main baitha huaa inako dekha karata tha. Ek din kuchch ladake kam aaye, Yogendra ne mujhase kaha ki aap bhi saath mein kheliye, aur main fielding karane laga. Isake baad hamari dosti ho gayi, aur ham cricket khelane ke liye phoolbagh ya company bagh jane lage. Ham log cricket ki baate karate aur vahi aas pas ghumate rahate.

 

Jab meri bahan  aur unake saath jane wali saheliyon ki classess khatam ho jati tab main apane ghar vapas aata.