Sadak par surakshit chalane ka adhikar

Sare desh ki sadkon par is desh ke sabhi nagarikon ko surkshit chalane aur aane jane ka adhikar hai. Chahe ve paidal chalein, chahe kisi vahan se, jo kuch bhi ho sakata hai masalan cycle, scooter, car ityadi.

Lekin maine bahut se shaharon mein dekha hai ki logon ne chaurahon par is kadar apani apani dookanein bana li hain ki rasta itana sankird hai, jisase avagaman badhit hota hai, is tarah ki mansikata wale , kaise log hain jinhe yah nahin samajh mein ata ki ve bhi is sadak se chalate hain. In logon ko isase koi matalab nahin rahata ki log kis kadar taklif se gujarate hain, aur aate jaate hain.

Aap kisi bhi sadak se jayein, udaharan ke liye GT Road mein Delhi se lekar Calcutta ki oar ayein ya jayein, sadak ke dono taraf kis kadar logon ne apane makan , dookan bana liye hain .

Yahi nahin , Logon ne Mandir aur mazarein tatha doosare dharmik sthal bana liye hain, jo sadak se kuchch foot ki doori par hain. Inase na kewal accident hote hain balki accident ke baad logon ko ghayal savariyon ko lootanein ka muaka aur dacaity karane ka avasar mil jata hai. Jahir hai isamein aaspaas ke rahane walon ka haath hota hai, yah sabhi janate hain.

Ye kaam koi aur nahin , garibi ke naam par garib kahalanewale karate hain. Inhe sthaniya dabango aur gubdo ka haath aur saath milata hai, jisake bal par ye pahale jamin par kabja karate hain, jo kabhi kabhi kai karod ki hoti hai, phir yahi dabang unhe makan ya mandir ya mazar banane ke liye sadhan muhaiyya karate hai, jamin ke kabje mein vistar karate hain aur phir ek din yahi dabang pahale wale ko dara dhamakakar bhaga dete hain aur phir swayam in kabja ki gayi jagahon par apana malikana haq jatate hain.

Agar is tarah ke awaidh kabjon ko hatane ki koshish koi adhikari karata hai, to netagiri shuru ho jati hai. Mandir hatane ka matalab, Hinduon ka dharam khatare mein pad jane se jod diya jata hai. Mazar hatane ka matalab Islam khatarey mein ho jana samajhaya jata hai. Yah chingari chchote netaon se lekar jila star ke netaon tak jab pahunchati hai, to is star ke neta apani netagiri chamakane ke liye pradesh star  ke neta ko lalakarate hain, baat phir ijjat aur moonchchon ki ladai par aa tikati hai.

Mansik roop se garib logon dwara kiya gaya karm, ant mein buddhijiviyon ke liye khad ka kaam karata hai aur jab media aur vidhan sabha ya sansad mein shor gapada ho jaye to phr kya kahanei ?

Kya ummid karana chahiye ki desh ki sadakein har nagarik ke liye aane jaane mein bina badha ke upalabdh hone ki gaurantee  dengi ?

Chikitsa Padyatiyon ko samajhiye

Apne desh mein kai prakar ki chikitsa vidhiyan maujud hain , ham sabhi unaka phayade uthate hain, lekin mujhe lagata hai ki 99 pratishat logon ko pata hi nahin hai ki unako jo bimari huyi hai , usaka behatar ilaj kis chikitsa pdhyati mein hai. Yani allopathy mein, ya surgery  mein, ya homoeopathy mein , ya ayurvedic mein , ya yoga aur prakratik chikitsa mein, ya unani mein , ya siddha mein,  ya herbal mein , ya jhad phoonk mein, ya anya doosari chikitsa vidhiyon mein.

Maine adhikansh logon ko dekha hai ki ve yahan vahan bimariyon ke ilaj mein bhatakate phirate hai, unhe rahat nahin milati hai, paisa bhi barbad hota hai aur marij bhi haath behaath ho jata hai.

Yadyapi  isaka koi satik formula to nahin hai, lekin mere vichar se niche di gayi tips kaam aa sakati hai:

1- Sabase pahale Bimari ka nidan jaroori hai, isaliye jo bhi jaroori parikshan hon, unhe awashya kara lein, jaise ki Ultra sound, x ray, khoon ki janch, yah Allopathy ilaj ke liye aavashyak hai

2- Abhi ayurvedic ilaj ke liye ek nai takanik ayi hai, jise Electrotridoshagraphy kahate hai, batate hain is parikshan ke kara lene ke baad anya parikshan karane ki jaroorat nahin padati aur yah anya parikshano ke mukabaley mein sasta hai

3- Bimary yadi acute kism ki hai to do char din tak allopathy ki dawa le sakatey hain, ya kuchch dinon tak, yani 15 din tak.

4- Yadi isase adhik dinon tak bimary bani rahe, aur allopathy dawa se kaboo na ho to kisi yogya Ayurved ki practi

Vidambana yah hai

Bhartiya Christian Community

Apane desh mein maine dekha hai ki christian community rajnitik taur par bahut pichche hai. Isaka karan janane ki maine koshish ki jarur, lekin isaka koi maakul javab mujhe nahin mil paya.

Bahartiya christian, mukhyataya do vyavasayon se sabasa jyada jude hain. pahala siksha  ka kshetra ,doosara swasthay sambandhit kshetra. isamen do ray nahin ki in dono kshetron mein jitana kaam christian community kar rahi hai, utana koi aur community nahin kar pa rahi hai. Isaka karan samajh mein yah aata hai, ki Christ ne Bible mein teen mukhya baatein kahi hain, jisame se pahala Prieching doosara teaching aur teesara healing shabda ka, upayog kiya gaya hai.

 Preiching jaisa ki sabhi janate hain , upadesh se juda hua hai. Dharmik shiksha se juda shabda hai, isaliye isake baare mein sabhi dharam wale janate hain.

Doosara hai teaching, teaching ke bahut mayane nikale ja sakate hain, lekin christians ise usi roop mein lete hain, jaisa ki develop hoker vartaman mein ham sabhi dekh aur samajh rahe hain.

Teesara healing shabda hai. Healing se matalab sharirik roop se heal karana. Isaka bada vishal kshetra hai. Sharirik healing to hai hi, is healing ko samajik healing, rajnaitik healing, sansakratik healings, community healings aadi ke mayane mein bhi le sakatey hain.

Yahi karan samajh mein aata hai ki christian community kewal apane kaam par jyada dhyan deti hai aur rajnitik pachadon mein na padakar apana aur apani community mein self centered hoker jivan yapan mein vishvas karati hai.

Main christian community ke kafi najadik hun. 25 December ko main apane nazdik ke church mein jata hun aur christ ke janma din ke karyakramo mein shamil hota hun. Main akasar apane christian mitron ke yahan jata hun, aur unase rajniti par charcha karata hun, lekin mujhe sabhi udasin dikhe. Maine  apane kai mitron ko salah di ki ve apana ek all christians front taiyar karen aur apani mangon ke liye sarkar ko represent karen. Main hamesha unako vishwas dilata hun ki aap log aage ayein ,apani baat rakkhe, ham bahusankhyak log ,aapaki jayaj mangon ke liye aapse kandhe se kandha milakar saath denge.

Lekin christian samuday ke ander koi pratikriya nahin hui ,aur sab usi tarah se apane kaam mein jute hain , jaise ve hamesh se karate aa rahe hain. is Udasinata ka koi karan nahin samajh mein aaya.

China Ki Sainik Karyawahi

Tibbet china se sata hua ek rastra kisi jamane mein tha. China ne use hadap liya, yah to itihas kar bata sakatey hain ya china ke rajneta, ki Tibbet hadapane ke pichche unaki kya  mansikata rahi hai.

Abhi pichchle pakhaware , chine ne apane sainik Tibbet ke under ghused kar phir karyawahi ki hai. Maine kuchch documentary films mein Tibbet ke under ho rahe sainik halachal ka jayaja liya hai, wahan ki sarkar aur sainikon ne jis tarah se daman chakra chala rakha hai wah kisi sabhya samaj ka charitra ujagar nahin karata hai.

Tibbet ke liye ham kya kar sakatey hai:

1- United nations ko yah notice mein lena chahiye aur china se stithi spast karane ke liye kahana chahiye

2- America jo sabae bada manavadhikar ka thekedar hai, use samaney aakar manavadhikar samiti bhejakar vahan ho rahe narsanghar ki stithi ko pahachanana chhiye

3- China agar yah kahata hai ki yah usaka underuni mamala hai, to ise katayi swikar nahin karana chahiye, ek jagah narsanghar ho aur use chupchap baithe dekha jay aisa to niti nahin kahati

4- Is mamle mein wahi rukh akhtiyar karana chahiye , jaise ki saare vishwa ne South Africa ki rangbhed wali sarkar ke saath kiya tha

Hamein is mamale mein kada rukh akhtiyar karana hoga. Main Swatantrata aur democracy mein  vishwash karata hun aur partantrata ke khilaf hun.

Main Tibbet ki swatantrata ka samarthan karata hun.

Sansad ka adhiveshan

Sansad ke is bazat adhiveshan se janata ko bahut ummiden thi, lekin sab par pani phir gaya. Lok lubhavan bajat ne pahale to sabaki banchche khila din , lekin jab andar ki kalabazi samane ayi to bahut nirasha huyi.

Hogi kyon na, jab janata ne bade bade mansube is sarakar se paal rakhken hon, netaji sabake samane lalach ka chara phenk rahe hon, ki kaise apana vote bank badhaya jay to yahi sab hoga hi. Lekin mujhe nahin lagata ki bharat ki janata itani bevkuf ho sakati hai ki vah is tarah ke jhanson mein aa jay.

Kuchch pharak pad sakata hai aur bahut pharak bhi pad sakata hai, yah to vakhta hi batayega, unt kis karavat baithega, yah to koi nahin janata lekin isaka andaza zaroor laga sakataey hain.

Mujhe nahin lagata ki janata dubara congress ki sarakar chhegi ? Yah to tay hai ki phija abhi se Rajag yani BJP aur unake alliance ki taraf ban rahi hai. Desh ki janata ab utani bevakoof nahin hai, jitana congress ke neta samajh rahe hain. Ve bhale hi apani pith apane aap thapthapa rahe hon, ki unhone koi bada teer maar diya hai, yah kewal mugalata hi sabit hoga.

Meri Ganit kahati hai ki is baar Congress ka singhasan jaroor dol jayega.

Holi ka berang

Is saal mujhe lagata hai Holi sabase worst tyohar sabit hua hai, itani mahagayi ab tak to maine nahin dekha, har chees ke daam itane chadhe huye, kya ho gaya hai. Har adami bilabila kar ji raha hai.

Phayada kisaka hai. Jo sarkar mein baithe hain, unako na to pahale kabhi  mahagayi na to nazar ayi hogi aur na unhe koi  mahagayo jaisi koi cheej nazar ayi hogi. Yahan hal yah hai ki har cheese ka jugad karane ke liye kewal rasmi taur par saman le rahe hain. Sarkari logon ke yahan  khud hi log saman pahuncha dete hai. Isaliye unhe mahagayi kabhi nazar nahin aati hai. Ve khud to koi saman kharidate nahin, isaliye unako aate daal ka kya bhav hai, yah bhi pata nahin hai. Doosari baat yah hai ki sabhi adhikari aur sarkari karmachari jitane bhi hain, koi bhi iman dar nahin hain sabhi saale chore hain aur bhrastachari hain. Mujhe aaj tak koi bhi sarakari adhikari imandar nahin mila, sabhi ke sabhi ghuskhore mile. Bina paisa diye kisi ne bhi mera kaam nahin kiya.

Inhi ghusakhoron ka ab sarakar ne char guna tankhwah badha diya hai.

Taslima aapaka is tarah jana bahut afsosnaak

Dhikkar hai Kendra sarakar ke numaindon ko, aisi rajniti karane walon ko, jo kathamullon ki un ichchaon ke  aage ghutane tekane ko  majaboor ho gaye aur musalamanon ko tustikaran karane ke liye sabase aage nazar aaye.

Dhikkar hai is desh ke budhdhijivion ko, jo na kewal manasik taur par napunshak ho gaye hain, balki ek pad aur ek padak ke liye bik chuke hain, jinhen yah nazar nahin aaya ki kalam ki takat kaya hoti hai.

Dhikkar hai is desh ke manavadhikar walon ko, jinhe yah nazar nahin aya ki ek abala mahila akele itana sab jhel rahi thi, to shanti ke numayande kahan kal kothari mein chchupe baithe the ,

Dhikkar hai is desh ke media walon ko, jinhe Narendra Modi ka kalank to yaad aa jata hai, khoji cameron se lais tahalaka wale na jane kahan se khabarein chura laate hain, lekin unhe yah nahin dikhai diya , ki ek mahila ke saath is desh mein kya ho raha hai,

Itana atyachar ek mahila par, bade sharm ki baat hai, bahana yah liya gaya ki dharmik bhavanayein ubhari ja rahi hain.

Ye sab bekar ki baatein lagati hai. Yah sab aur sab voton ki khatir kiya gaya, lekin congress ko main chetawani de raha hun, ki abaki wah is mugalatey mein na rahe ki unaki sarakar dubara ban jayagi, isake parinaam unhe bhugataney honge aur main Pranav Mukharjee ke liye abhi se bhavishya bani kiye de raha hun ki yah unaka antim Loksabha ka karyakaal sabit hoga. Congress jis tarah se is desh ki janata ke saaath bartav kar rahi hai, aur kiya ja raha hai usase unako yah galat phahami nahin paal leni chahiye ki janata unako dubara phir gaddi par batha degi.

Jitani takalifein Congression ne apane is paanch saal ke karyakaal mein diya hai, is desh ki janata samay aane par makul javab degi.

Taslima, aapaka is tarah se Bharat se jana bahut afsosanaak hadsa hai. Mujhe aapse sahanubhuti hai.

Mahangayi ne nichod diya

Yah kaisi vidambana hai ki itane bade desh ko chalane wale Pradhan Mantri khud vishwa ke gine chune Arthashashtriyon mein hain. Unhe abhi bhi bahut se vishwavidyalayon ne Arthshashtra par manad degrion ko saunpa hai.

Lekin Shri Man Mohan singh ji manhagayi ko nahin rok paye. In dinon Khane pine ki chijon par aag lagi huyi hai, log baukhala rahe hain ki kya kiya jaye. Jab se yah sarkar aayi hai, isane sivay logon ki takalif badhane ke alava aur doosara koi kam nahin kiya hai.Khana pakane wali gas ka bahut bura hal hai. ek se lekar do mahine ke bhitar silinder mil rahe hain, wah bhi jab teen teen din tak barabar gas agency ke yahan jakar maththa teka jaye. Is sarakar ke jamane mein baba adam jamane ka nazara pesh kar diya hai. ABVajpayi ki sarakar ke samay mein gas wale ghar ghar jakar silinder tehele mein aaloo pyaz ki tarah bharakar le jate  the aur kahate the ki chahe gas book ho ya na ho agar silinder khali hai to gas ka tanatan bhara hua silinder le lein. Ek wah jamana tha ek yah hai ki gas dhoonde nahin mil rahi hai.

Kahan chala gya intane bade arthshashtri ka arthashashtra. Kya Ab kisi ko bhi nahin lagata ki koi mahangayi hai ?.

Pakistan dwara Sarabjit Singh ko Phansi Nahi dena chahiye

Jindagi aur maut sab upar wale ke pas hai, ham is duniya mein paida hote hain to poori umra paane ke liye, aur bharpoor jindagi jeene ke liye. Insan ke jivan mein, bahut kharab aur bahut achcha samay bhi aata hai, yah sab upar wale ke haath mein hai, ki wah kisako kitane din is duniya mein rakhata hai.

Bhartiya nagarik Sarabjit singh ko bhale hi wahan ki sarakar ne phansi ki saja de di ho, yah sab mere vichar se sahi hoga. Kyonki jitane bhi trial court mein huaye honge , mujhe lagata hai sab sahi hoga. Yah bhi sahi hai ki kisi bhi desh ka koi bhi nyayadhish nahin chahega ki usake haath se koi galat phaisala ho jay aur koi begunah mara jay. 

Preident Musharraf ne sarbajit ki daya yachika ashvikar kar di hai, to yah to nishchit ho gaya ki sarabjit ko ek na ek din phansi par jhulana hoga. Yah maut vakai mein dil hila dene wali hogi.

Phir bhi ek rasta abhi usake bachane ka hai. Jaisa ki shariyat mein kaha gaya hai =={ main janma se Hindu hun, lekin main aaj bhi “Pawitra Kuran” ka hindi bhasa ka transalation apane paas rakhata hun aur use padhakar Islam dharma ko samajhane ki koshish karata hun} == ki yadi maranewale ke pariwar ke log maaranewale ko maaf kar dein to jise maut ki saja di gayi hai, use bachaya ja sakata hai.

Main samajhata hun, ki sarabjit ke parivar walon ko Pakistan jakar jo log mare hain , unake pariwar walon se milakar unako samajhayein ki jaan lene se behatar jaan bakhs dena shabab ka kam hai.

Mujhe ummid hai ki is kadam se marane walon ke parivar ke log jaroor kuchch na kuchch sochenge aur sarbajit ki jaan bakhasane ke liye koi thos upay kareinge.

Is samay Bharat aur Pakistan ke avaam dosti ke ek naye daur mein kandhe se kandha aur dil se dil milakar saath saath chalane ki disha mein ham- kadam  aur ham-rahi banakar chal rahe hain, Sarabjit ki phansi ki saja agar Aajivan karavas mein bhi badal jati hai to yah bahut achcha kadam hoga. Kyonki mera manana hai, ki doshi ko saja jaroor di jay, lekin jine ke haq se maharoom na kiya jaye.

Main vishwas karata hun ki Pakistan ki janata aur sarakar ek baar aur antim bar phir is par vichar karegi.

Belagam Rajnitigya

Rahul gandhi ne jis tarah se Urisa mein surksha ke saath khilwad kiya hai, use katai jayaj nahin thahraya ja sakata. Mujhe Rahul Gandhi ke baare mein Samajwadi party ke neta Shri Amar Singh ki tippani yad aa gayi ki , “Rahul abhi launde hain, unaki rajniti ka kya gyaan hai”. 

Yah to accha hua ki unake saath koi anahoni nahin hui, varana na jane kya ho jata. Kuchch bhi ho sakata tha. Naxalites ya phir koi atankwadi sangathan inhe apaharan karake kuchch bhi kara sakate the, aur is desh ko bhari kimat chukani pad sakati thi.

Neta doosare ko bahut upadesh deta hai. Rahul Gandhi swayam batawein ki unaki kya upalabdhiyan rahi? Unhone is desh ke liye kya kiya? Garib aur garib hota ja raha hai aur amir aur amir. Yah paisa kahan ja raha hai? Ye rajnitigya kisako phayada pahuncha rahe hain ? Kisaki jebein bhar rahe hain?

Main samajhata hoon ki Rahul gandhi abhi 10 se  20 saal rajniti ki riyaz karein, anubhav prapta karein, kisi short cut tarike se satta ke galiyare mein jane ki koshish na karein, yahi unake liye achcha hoga.

Rahul khud ko road show se parahej karein to jyada achcha hoga. Road show media ke liye achcha masala sabit ho sakata hai, lekin rajniti mein nahin. Rajniti thos kaam chahati hai. Hava bazi mein koi kaam nahin hota.

Main phir Shri Amar singh ki tippadi ko yaad dilana chahata hun. Rahul Gandhi ek paripakva rajneta bane, isake liye main unhe ashirwad aur shubhakamnayein deta hun.

Meri Rahul Gandhi ko ek aur salah hai, ki ve jitani jaldi ho sake apani shaadi racha daalein, isase unaka rajnitik gyan aur adhik paripakva hoga aur bhagya bhi badhega. Kaha bhi gaya hai ki :”stri charitram purushahya bhagyam, devo na janat kuto manushya”.